میدیای ئەمریكا: واشنتۆن تاوتوێی كشانەوەی سەرجەم هێزەكانی لە سووریا دەكات

پەیام  

میدیای ئەمریكا دەڵێت دوای ڕووداوەكانی ئەمدواییە، بەرپرسانی ئەمریكا بیر لە كشانەوەی سەرجەم هێزەكانی لە سووریا دەكەنەوە.

ڕۆژنامەی وۆڵ ستریت جۆرناڵ بە پشت بەستن بە لێدوانی سێ بەرپرسی كۆشكی سپی، بڵاویكردووەتەوە، كە دوای ئۆپڕاسیۆنەكانی سوپای سووریا دژ بە هێزەكانی سووریای دیموكرات "هەسەدە" و سەركەوتنی سوپا لە ئۆپڕاسیۆن و هێرشەكاندا، پرسیاری لەبارەی كاریگەریی ئەركی سوپای ئەمریكا لە سووریا دروستكردووە و واشنتۆن بیر لە كشانەوەی سەرجەم هێزەكانی لەو وڵاتە دەكاتەوە.
بەرپرسەكانی ئەمریكا ئاماژەیان بەوەش داوە "ئەگەر هەسەدە بە تەواوی ڕووبەڕووی شكست ببێتەوە، ئەوە هیچ هۆكارێك بۆ مانەوەی هێزەكانی ئەمریكا لە سووریا نامێنێت".

باسیان لەوەش كردووە كە لە ئێستادا، ناوەندەكانی دەستبەسەركردنی ئەندامان و خێزانەكانی ڕێكخراوی داعش لە سووریا نیگەرانیی لای ئەمریكا دروست كردووە، بەڵام سوپای ئەمریكا لە كۆی نۆ هەزار ئەندام و خێزانە دەستبەركراوەكانی داعش، حەوت هەزاریانی لە سووریاوە بۆ زیندان و ناوەندە تایبەتمەندەكان لە عێراق گواستووەتەوە.
هاوكات ڕۆژنامەی وۆڵ ستریت جۆرناڵ ئاماژەی بەوە داوە، كە لەئێستادا هەزار سەربازی ئەمریكا لە سووریا بوونیان هەیە، كە زۆربەیان لە ناوچەكانی باكووری ڕۆژهەڵاتی ئەو وڵاتە و لە سنووری ڕۆژاوای كوردستان نیشتەجێ كراون، بەڵام تاوتوێی كشانەوەی تەواوەتی دەكەن.