هەسەدە: لە ڕێککەوتنەکەمان لەگەڵ سوریا هەموو مافەکانمان پارێزراون

پەیام  

ناوەرۆكی ڕێككەوتنی نوێی نێوان هێزەكانی سووریا دیموكرات و حكومەتی سووریا ئاشكرا كرا. چوار لیوا بۆ هێزەكانی هەسەدە دروست دەكرێت و مافە كارگێڕی و پەروەردەییەكانی كورد پارێزراو دەبن. هەروەها هێزەكانی ئاسایشی ناوخۆی سەر بە حكومەت دەچنە ناو شارەكانی حەلەب و قامیشلۆ.

ناوەندی ڕاگەیاندنی هێزەكانی سووریای دیموكرات و هاوكات میدیای سووریا، ناوەرۆكی ڕێككەوتەكەیان بڵاو كردەوە، هەسەدە ڕایگەیاند: گەیشتوون بە ڕێككەوتنێكی گشتگیر كە ئامانج لێی یەكپارچەیی خاك و یەكگرتنەوەی هێزەكانە. ڕێككەوتوون لەسەر ئاگربەست و یەكخستنی دامەزراوەكان لەنێوان هەردوو لادا.

بەپێی ڕێكەوتنەكە، هێزە سەربازی و دامەزراوە كارگێڕییەكان لەنێوان هەردوولا تێكەڵ بەیەك دەكرێن و بڕیاریش دراوە هێزە سەربازییەكان لە هەموو خاڵەكانی بەریەككەوتن پاشەكشە بكەن.

هەروەها هێزەكانی ناوخۆی سووریا دەچنە ناو سەنتەری شارەكانی حەسەكە و قامیشلۆوە و، فیرقەیەكی سەربازیش لە سێ لیوای هێزەكانی سووریای دیموكرات پێكدەهێنرێت.

هاوكات لیوایەكی تایبەت بۆ كۆبانێ لە چوارچێوەی فیرقەی حەلەب دروستدەكرێت و دامەزراوەكانی خۆبەڕێوەبەری دەخرێنە سەر دامودەزگا فەرمییەكانی دەوڵەت و فەرمانبەرە شارستانییەكان بە فەرمی لەناو دامەزراوەكانی دەوڵەت جێگیر دەكرێن.

هەسەدە دەڵێت هەموو مافە مەدەنی و پەروەردەییەكانی گەلی كورد لە ڕێككەوتنەكەدا پارێزراون و گەرەنتیی گەڕانەوەی ئاوارەكان بۆ ناوچەكانیان دەكرێت.