پاكستان: بەشداریمان لە شاندی ئاشتی غـ.ەززە لەپێناو دابینكردنی هاوكارییەكانە

پەیام  

پاكستان ڕایگەیاند بەشداریكردنیان لە شاندی ئاشتی غەززە تەنها بۆ ڕاگرتنی كۆمەڵكوژی و دابینكردنی هاوكارییەكانە و ناچێتە ناو ڕێككەوتنی ئاساییبوونەوە لەگەڵ قەوارەی زایۆنی.

وتەبێژی وەزارەتی كاروباری دەرەوەی پاكستان ڕایگەیاند، وڵاتەكەی پەیوەندی بە "پەیمانی ئیبراهیم" (ڕێككەوتنی ئاساییبوونەوە لەگەڵ قەوارەی زایۆنی) ناكات و هیچ بڕیارێكیشی بۆ بەشداریكردن لە هێزە نێودەوڵەتییەكانی پاراستنی ئاشتی لە غەززە نەداوە.

تایەر ئەندەرابی، وتەبێژی وەزارەتی دەرەوەی پاكستان لە كۆنگرەیەكی ڕۆژنامەوانیدا لە ئیسلام ئاباد ڕایگەیاند، ئامانجی وڵاتەكەی لە بەشداریكردن لە شاندی ئاشتی، هەوڵێكی دڵسۆزانەیە بۆ ڕاگرتنی كۆمەڵكوژیی فەڵەستینییەكان. جەختیشی كردەوە كە ئەم بەشداریكردنە بە هیچ شێوەیەك بە واتای چوونە ناو پەیمانی ئیبراهیم یان هاوبەشیكردن لە هێزە نێودەوڵەتییەكان نییە.

حكوومەتی پاكستان هەفتەی ڕابردوو، بە فەرمی بانگهێشتی بەشداریكردن لە شاندی ئاشتیی غەززەی قبووڵ كرد. وەزارەتی دەرەوەی ئەو وڵاتە هیوای خواست ئەم چوارچێوەیە ببێتە هۆی جێبەجێكردنی ئاگربەستی هەمیشەیی، گەیاندنی هاوكارییە مرۆییەكان بۆ غەززە و هەنگاونان بەرەو دامەزراندنی دەوڵەتێكی سەربەخۆی فەڵەستینی.