زریانە بەفراوییەكەی ئەمریكا 85 کەسى کوشتووە و لە 18 ویلایەتیش باری نائاسایی ڕاگەیەندراوە

پەیام  

ژمارەی گیانلەدەستدان بەهۆی زریانە بەفراوییەكەی ئەمریكا بۆ 85 كەس بەرزبووەوە، لە 18 ویلایەتیش بەهۆی خراپی كەشوهەوا و تێكچوونی هاتوچۆی ئاسمانی، باری نائاسایی ڕاگەیەندراوە.

میدیاكانی ئەمریكا ڕایانگەیاند، ژمارەی ئەو كەسانەی بەهۆی ئەو زریانە بەفراوییە بەهێزەی وڵاتەكەی گرتووەتەوە گیانیان لەدەستداوە، بۆ 85 كەس بەرزبووەتەوە. ئەمەش لە كاتێكدایە كە ئامارەكانی پێشوو ئاماژەیان بە 73 گیانلەدەستدان دەكرد.

بەپێی ڕاپۆرتەكان، نزیكەی نیوەی گیانلەدەستدانەكان لە ویلایەتەكانی تێنیسی، میسیسیپی و لویزیانا لە باشووری وڵات تۆمار كراون؛ ئەو ناوچانەی كە بەزۆری زستانی سەخت و بێوێنەیان تێدا نییە. هۆكارەكانی گیانلەدەستدان جۆراوجۆر بوون، لەوانە: دابەزینی پلەی گەرمی لەش، ژەهراویبوون بە یەكەم ئۆكسیدی كاربۆن، ڕووداوی هاتوچۆ و ڕووداوەكانی پەیوەست بە پاككردنەوەی بەفر.

ڕۆژی شەممەی ڕابردوو بەهۆی توندیی زریانەكەوە، لە 18 ویلایەتی ئەمریكا و واشنتۆنی پایتەخت باری نائاسایی ڕاگەیەندرا و بەو هۆیەوە هەزاران گەشتی ئاسمانی هەڵوەشێندرانەوە.