فەرماندەیەكی ئەمریكا باس لە ئۆپڕاسیۆنێكی خێرا و كورتمەودا بۆ سەر ئێران دەكات

پەیام  

فەرماندەیەكی باڵای ئەمریكا باس لەوە دەكات، وڵاتەكەی ئامادەكاری بۆ ئۆپراسیۆنێكی خێرا و پاك و ماوەكورت لە ئێران دەكات.

لە كۆبوونەوەیدا لەگەڵ ئیال زامیر، سوپاسالاری قەوارەی زایۆنی. بڕاد كۆپەر، فەرماندەی فەرماندەیی ناوەندیی ئەمریكا "سێنتكۆم" ڕایگەیاند: ئامادەكاری بۆ ململانێ و ڕووبەڕووبوونەوەی ئێران پێویستی بە كاتە بەڵام ویلایەتە یەكگرتووەكانی ئەمریكا بۆ هەر ڕێكار و هێرشێكی سنووردار ئامادەیە.

ئەو فەرماندەیەی واشنتۆن باسی لەوە كردووە پێویستە ڕژێمی سیاسی لە ئێراندا بگۆڕێت و ئەگەر هێرشیش بكەن ئەوا ئەو كەسانە بە ئامانج دەگرن كە ئازاری خۆپیشاندەرانیان داوە. ڕاشیگەیاندووە: ئەمریكا بڕوای بە ئۆپراسیۆنێكی خێرا و پاك و كورتمەودا هەیە لە ئێراندا.

لای خۆیەوە سوپاسالاری زایۆنی ڕایگەیاندووە، هێشتا وادەی هێرشكردنە سەر ئێران دیارینەكراوە و بابەتەكە پەیوەستە بە بڕیاری ترەمپەوە.

هاوكات دەستەی پەخشی ئیسرائیلی ئاماژەی بەوە داوە، هەردوو بەرپرسەکە تاوتوێی ئەگەری هێرشی مووشەكیی ئێرانیان بۆ سە قەواەری زایۆنی كردووە لە ئەگەری بەئامانجگرتنی ئەو وڵاتەدا.

هێرش و هەڕەشەكانی واشنتۆن و تەلئەبیب لەكاتێكدان، بەرپرسانی سیاسی و سەربازیی ئێران چەندینجار جەختیان لەوە كردووەتەوە، هەر هێرشێك بكرێتە سەر وڵاتەكەیان، ئەوا پێگە و بەرژەوەندییەكانی ئەمریكا لە ناوچەكە بەئامانج دەگرن و بە توندی وەڵام دەدەنەوە.