پێش 3 هەفتە
233 جار خوێنراوەتەوە
سەرۆكی بەڕازیل: ترەمپ نەتەوەیەكگرتووەكانێكی نوێ دروستدەكات تا خۆی ببێتە سەرۆكی
پەیام
سەرۆكی بەڕازیل هاوتا ئەمریكییەكەی بۆ هەوڵدان بە دروستكردنی ڕێكخراوێكی نوێی نەتەوە یەكگرتووەكان تۆمەتبار دەكات.
لویس ئیناسۆ لۆلا دا سێلڤا سەرۆكی بەڕازیل، دۆناڵد ترەمپی سەرۆكی ویلایەتە یەكگرتووەكانی تۆمەتبار كرد بەوەی دەیەوێت ببێتە سەرۆكی ڕێكخراوی نەتەوە یەكگرتووەكانی نوێ و ڕایگەیاند: بە ئامانجی دۆزینەوەی ڕێگەیەك بۆ دیدار و بەرگرییكردن لە سیستمی فرەیی نێودەوڵەتی لەگەڵ سەرۆكی چەند وڵاتێكی جیهان بۆ بەرگریی لە ڕێكخراوی نەتەوە یەكگرتووەكان پەیوەندیی كردووە.
لە وتەیەكیداـ لۆلا دا سێلڤا ڕەخنەی لە دروستكردنی ئەنجوومەنی ئاشتی گرت كە هەفتەی ڕابردوو لە پەراوێزی كۆڕبەندی داڤۆس ڕاگەیەنرا و وتی: لەجێی ئەوەی چاكسازی لە نەتەوە یەكگرتووەكان بكرێت، چی ڕوو دەدات؟! سەرۆك ترەمپ نەتەوە یەكگرتووەكانێكی نوێ دروست دەكات تا خۆی ببێتە سەرۆكی!
لە درێژەی قسەكانیدا، سەرۆكی بەڕازیل لە بەرانبەر "تاكڕەوی" و "یاسای بەهێزترین" بەرگریی لە "فرەیی" كرد و ڕایشیگەیاند: پەیماننامەی نەتەوە یەكگرتووەكان دەدڕێنرێت.
سەرۆكی بەڕازیل ڕەخنەی لە پڕۆژەی ئاوەدانكردنەوەی كەرتی غەززەی فەڵەستینیش گرت و ڕایگەیاند: وێرانیان كرد و 70 هەزار كەسیان كوشت، بۆ ئەوەی ئێستا پێمان بڵێن سەرلەنوێ بنیاتی دەنێینەوە و میوانخانەی ناوازەی تێدا دروست دەكەین.
لە تۆڕە کۆمەڵایەتیەکان شەیری بکە