سەرۆککۆماری سووریا واژۆی لەسەر دەستبەکاربوونی پارێزگاری حەسەکە کرد

پەیام 

ئەحمەد شەرع، سەرۆککۆماری سووریا بە فەرمی واژۆی لەسەر دەستبەکاربوونی نورەدین عیسا ناسراو بە ئەبو عومەر خانیکا وەکو پارێزگای حەسەکەی کوردنشین لە ڕۆژئاوای کوردستان کرد.

بەگوێرەی ڕێککەوتنی نێوان هێزەکانی سووریای دیموکرات (هەسەدە) لە ئیدارەی خۆسەری ڕۆژئاوای کوردستان و حکومەتی کاتیی دیمەشق، هەسەدە پارێزگارێکی کورد بۆ پارێزگای حەسەکە دیاری دەکات، دواجار لە کۆتایی مانگی ڕابردوودا، ئیدارەی خۆسەر نورددەین عیسای وەکو پارێزگاری نوێی حەسەکە دیاریکرد.

سەرۆکایەتیی سووریا فەرمانی ژمارە 30ـی ساڵی 2026 بە واژۆی ئەحمەد شەرع بڵاو کردەوە کە تێیدا هاتووە، لەسەر بنەماکانی جاڕنامەی دەستووری، نورەددین ئەحمەد عیسا بە پارێزگاری پارێزگای حەسەکە دەستنیشان کرا و ئەم فەرمانە دەگەیەنرێتە لایەنە پەیوەندیدارەکان بۆ جێبەجێکردنی.

نورەددین عیسا ناسراو بە ئەبو عومەر خانیکا، ئەندازیارە، خەڵکی خانیکای قامیشلۆیە، بە یەکێک لە نزیکەکانی مەزڵووم عەبدی دەناسرێت. لەساڵی 1969 لەدایکبووە، پێشتر چەندین پۆستی حکومی هەبووە، دوایین پۆستی بەڕێوەبەری گشتی پەیوەندییەکانی حەسەکە بووە.