عێراق: لە هەوڵدان بۆ ناردنەوەى دەستگیرکراوان بۆ وڵاتەکانى خۆیان

پەیام

لێکۆڵینەوە سەرەتایییەکان لەگەڵ ئەو زیندانیانەی لە سووریاوە بۆ عێراق گواستراونەتەوە، زانیاریی گرنگیان ئاشکرا کردووە. ئەمە لە کاتێکدایە کە ڕێکارە دادوەری، ئەمنی و دیپلۆماسییەکان بۆ مامەڵەکردن لەگەڵ ئەم دۆسیە ئاڵۆزە بەردەوامن.

فەریق سەعد مەعن، سەرۆکی شانەی ڕاگەیاندنی ئەمنی، بە ڕۆژنامەی "الصباح"ی ڕاگەیاندووە کە لێکۆڵینەوەکان بوونەتە هۆی بەدەستهێنانی دانپێدانان لەسەر ئەو تاوانانەی چەتەکانی داعش لە ناوخۆی عێراقدا ئەنجامیان داون، لەوانە:

کۆمەڵکوژی دژی ئێزدییەکان، بەکارهێنانی ماددەی کیمیایی لە کاتی کۆنترۆڵکردنی هەندێک ناوچەدا و، ئاشکراکردنی پێکهاتەی ڕێکخراوەکە و پلانەکانیان بۆ داهاتوو.

هاوکات، ئەنجومەنی باڵای دادوەری ڕایگەیاندووە، کە لێپرسینەوەی سەرەتایی بۆ زیاتر لە ٥٠٠ تۆمەتبار تەواو بووە، لە کۆی ٥,٧٠٤ تۆمەتبار کە هەڵگری ٦١ ڕەگەزنامەی جیاوازن، لەگەڵ ئەوەشدا تا ئێستا ١٥٧ مێردمنداڵ (تەمەن ژێر ١٨ ساڵ) جیاکراونەتەوە بۆ ئەوەی ڕەوانەی دادگای مێردمنداڵان و خانەکانی چاکسازی بکرێن، بە مەبەستی مامەڵەکردن لەگەڵیان بەپێی پێوەرە مرۆیی و یاسایییەکان.

هەروەها، دکتۆر هیشام عەلەوی، بریکاری وەزارەتی دەرەوە، جەختی لەوە کردەوە کە وەزارەتەکەیان لە پەیوەندی بەردەوامدایە لەگەڵ حکومەتی ئەو وڵاتانەی کە هاوڵاتییان لە ناو گیراوەکاندان، هەندێک وڵات ئامادەییان نیشانداوە بۆ وەرگرتنەوەی هاوڵاتییەکانیان، بەڵام هەندێکی تریان سەرەڕای نووسراوە فەرمییەکان، تا ئێستا هیچ وەڵامێکیان نەداوەتەوە.