باڵیۆزی ئەمریكا: ئـ.یسڕائیل دەست بەسەر ڕۆژهەڵاتی ناوەڕاستدا بگرێت، قبووڵكراوە

پەیام

باڵیۆزی ئەمریكا لە قەوارەی زایۆنی بە حاڵەتێكی ئاسایی و قبووڵكراوی دەزانێت قەوارەی زایۆنی دەست بەسەر تەواوی ڕۆژهەڵاتی ناوەڕاستدا بگرێت!

مایك هاكابی، باڵیۆزی ویلایەتە یەكگرتووەكانی ئەمریكا لە قەوارەی زایۆنی، لە لێدوانێكیدا ئاماژەی بەوە كرد "هیچ گرفتێك نابینێت لەوەی ئیسڕائیل دەست بەسەر تەواوی ناوچەی ڕۆژهەڵاتی ناوەڕاستدا بگرێت".

باڵیۆزی ئەمریكا ئەم هەڵوێستەی بۆ تەفسیرە ئایینییەكان و ئەوەی بە "مافی تەوراتی" ناوی برد، گەڕاندەوە كە لە ڕووباری نیلەوە تا فورات دەگرێتەوە.

ئەم قسانەی مایك هاكابی لە میانی چاوپێكەوتنێكیدا هات، كاتێك پرسیاری لێ كرا ئایا پشتگیری لەوە دەكات ئیسڕائیل وڵاتانی ئوردن، سوریا، لوبنان و بەشێكی عێراق و سعودیەش بگرێت؟ لە وەڵامدا هاكابی وتی: دڵنیا نیم هەموو ئەو خاكە بێت، بەڵام پارچە زەوییەكی زۆر گەورە دەبێت! 
وتیشی: ئەگەر شتێكی وا بكرێت و هەموو ئەو خاكانە دەست بەسەردا بگرن ئەوە كارێكی قبووڵكراو دەبێت.

مایك هاكابی باڵیۆزی ئەمریكا لە قەوارەی زایۆنی، مەسیحییەكی ئینجیلییە، نوێنەرایەتی ڕەوتێكی پارێزگاری كلاسیكییە كە بە توندی پاڵپشتی لە قەوارەی زایۆنی دەكات، پێشتریش چەندین جار جەختی لە "مافی خودایی" ئیسڕائیل بۆ لكاندنی كەناری خۆراوا بە قەوارەكەیەوە كردووەتەوە.