3 کاتژمێر پێش ئێستا
199 جار خوێنراوەتەوە
لەسەر سنوورە ئاوییەكانی، عێراق ناڕەزایی گەیاندە سێ وڵاتی عەرەبی
پەیام
بەهۆی پشتگیریكردنیان لە كوێت سەبارەت بە سنوورە ئاوییەكان، بەغداد ناڕەزایەتی گەیاندە باڵیۆزانی سێ وڵاتی عەرەبی و سیاسییەكی عێراقیش باس لە دانپێدانانی نەتەوە یەكگرتووەكان بۆ نەخشەكەی عێراق دەكات.
دوای ئەوەی وڵاتانی ئوردن، میسر و فەڵەستین، بەیاننامەی فەرمییان هاوتەریب لەگەڵ هەڵوێستی كوێت دەركردبوو سەبارەت بە سپاردنی نەخشەی ناوچە دەریاییەكانی عێراق بە نەتەوە یەكگرتووەكان، بێ ئەوەی ئاماژە بە مافە یاساییەكانی عێراق لەو دۆسیەیەدا بكەن، وەزارەتی دەرەوەی عێراق، باڵیۆزانی ئەو وڵاتانەی بانگهیشتكرد و سەرزەنشتی كردن و ناڕەزایەتیی بە پایتەختەكانیان گەیاند.
محەمەد حوسێن بەحرولعلوم، بریكاری وەزارەتی دەرەوە بۆ پەیوەندییە دووقۆڵییەكان، لە زنجیرە كۆبوونەوەیەكی جیاوازدا لەگەڵ باڵیۆزانی ئەو سێ وڵاتە لە بەغداد، جەختی لەوە كردەوە كە بڕیاری سپاردنی نەخشەكە "مافێكی سەروەریی جێگیرە".
ڕاشیگەیاند ئەم هەنگاوە بەپێی بڕیارەكانی نەتەوە یەكگرتووەكان و رێككەوتننامەی یاسا دەریاییەكانی (1982) و بە رێكارە دیپلۆماسییە شەفافەكان ئەنجام دراوە.
بەحرولعلوم هەرچەندە جەختیشی لە گرنگیی پەیوەندییە مێژووییەكانی نێوان عێراق و ئەو وڵاتانە كردەوە، بەڵام نیگەرانیی قووڵی بەغدادیشی بەرامبەر ئەو بەیاننامانە دەربڕی و ئاماژەی بەوە كرد، كە ئەم هەڵوێستەی وڵاتانی ناوبراو بووەتە هۆی دروستبوونی ناڕەزایەتی لەسەر ئاستی فەرمی و جەماوەری.
لای خۆیشیەوە عەبدولستار فەواز دلێمی، كە سەركردەیەكی هاوپەیمانی عەزمی عێراقییە ڕایگەیاندووە، نەتەوە یەكگرتووەكان دانپێدانانی بۆ نەخشەكە بڵاوكراوەكەی عێراق بەشێوەیەكی ڕانەگەیەنراو گەیاندووەتە كوێت و جەختی لە خاوێنی و پشتبەستوویی نەخشەكە بە بەڵگەی فەرمی كردووەتەوە، كە جێگەی گومان نین.
لە تۆڕە کۆمەڵایەتیەکان شەیری بکە