هۆشداریی لەبارەى دواكەوتنی هەڵبژاردنی سەرۆككۆمارەوە دەدرێت

پەیام

هاوپەیمانیی «ئاوەدانكردنەوە و گەشەپێدان» بە سەرۆكایەتیی محەمەد شیاع سوودانی، جەخت دەكاتەوە، دواكەوتنی هەڵبژاردنی سەرۆككۆمار بۆ ماوەی نزیكەی دوو مانگ، پێشێلكارییەكی ئاشكرای دەستوورە و لێی بێدەنگ نابن.

فراكسیۆنی پەرلەمانیی هاوپەیمانیی "ئاوەدانكردنەوە و گەشە" لە بەیاننامەیەكدا داوای لە دەستەی سەرۆكایەتیی پەرلەمان كرد، هەفتەی داهاتوو دانیشتنێكی تایبەت بۆ هەڵبژاردنی سەرۆككۆمار ڕێكبخات؛ تاوەكو كۆتایی بە تێپەڕاندنی وادە دەستوورییەكان بهێنرێت،  هۆشداریشی دا كە ئەگەر دۆخەكە بەم شێوەیە بەردەوام بێت و پڕۆسەی سیاسی پەكبخرێت، پەنا بۆ هەموو ڕێكارە دەستووری و یاساییەكان دەبەن بۆ كۆتاییهێنان بەم چەقەبەستووییە.

هەروەها داوای لە لایەنە كوردییەكان كرد، كە پێش كاتی دانیشتنەكە لەسەر بەربژێری خۆیان ڕێكبكەون، بۆ ئەوەی ڕێگە خۆش بێت بۆ پێكهێنانی حكوومەتێكی خاوەن دەسەڵاتی تەواو كە بتوانێت خزمەتگوزارییەكان پێشكەش بكات و سەقامگیریی سیاسی و دامەزراوەیی بپارێزێت.

لە بەیاننامەكەدا جەخت لەوە كراوەتەوە كە مانەوەی حكوومەت بە دەسەڵاتی سنووردارەوە، زیانی ڕاستەوخۆی بە بەرژەوەندییەكانی گەل و كارەكانی دەوڵەت گەیاندووە، ئاماژەی بەوەش كردووە، كە ئەوان هەموو ئامرازە دەستوورییەكانی بەردەستیان بەكاردەهێنن بۆ پاراستنی ڕێڕەوی یاسایی وڵات و چیتر ڕێگە نادەن پڕۆسەی گەیشتن بە شایستە نیشتمانییەكان پەكبخرێت.