دوورگەیەكی نەوتی ئێران بۆردومان كرا و تارانیش زیانەكان ڕەتدەكاتەوە

پەیام 

جەنگی سەر ئێران دوو هەفتەی تێپەڕاندووە و ئەمڕۆیش دوورگەیەكی نەوتی ئێران بە ئامانج گیرا، بەڵام تاران زیانەكان ڕەت دەكاتەوە.

لە 15هەمین ڕۆژی جەنگی سەر ئێراندا ئەمریكا و قەوارەی زایۆنی زنجیرەیەك هێرشێكی دیكەیان كردە سەر وڵاتەكە و دەنگی تەقینەوە لە چەندین ناوچەی جیاواز بیسترا.

لە چوارچێوەیەدا دورگەی خارگ كە ناوەندی سەرەكی 90%ی هەناردەی نەوتی ئێرانە بۆردومان كرا و میدیا ئێرانییەكانیش باسیان لەوە كردووە دەنگی 15 تەقینەوەی بەهێز لە دوورگەكە بیستراوە.

لای خۆیەوە، بەرەبەیانی ئەمڕۆ دۆناڵد ترەمپ سەرۆكی ئەمریكا جگە لەوەی ئەنجامدانی هێرشەكەی بۆ سەر دوورگەی خارگ ڕاگەیاند، هەڕەشەی لەنێوبردنی تەواوی ژێرخانی نەوتی ئێران لەو دوورگەیە دەكات ئەگەر تاران لە داخستنی گەرووی هورمز و ڕێگریكردن لە هاتوچۆی كەشتییەكان بەردەوام بێت.

ترەمپ، ڕایگەیاند كە هێزەكانی وڵاتەكەی سەرجەم ئامانجە سەربازییەكانی ناو دوورگەی خاركیان پێكاوە و سیستمی بەرگریی ئاسمانییشیان تێك شكاندووە.

لە بەرانبەردا، میدیا فەرمییەكانی ئێران و ئاژانسی فارس ڕایانگەیاند: هیچ زیانێك بەر دامەزراوە نەوتییەكان لە دوورگەی خارگ نەكەوتووە. 

سەرچاوە ئێرانییەكان بانگەشەكانی ترەمپیان سەبارەت بە تێكشكانی بەرگرییە ئاسمانییەكان ڕەت كردەوە و جەختیان كردەوە كە سیستمەكان تەنها دوای كاتژمێرێك لە هێرشەكە دووبارە كارا كراونەتەوە.

هاوكات، بەرپرسانی ئەمریكا بە (سی ئێن ئێن)یان ڕاگەیاندووە "هێرشەكان تەنها بنكە سەربازییەكانیان كردووەتە ئامانج نەك كەرتی نەوت".