ئەمریکا 10 ملیۆن دۆلار پاداشت دەدات بەو کەسەى شوێنى سەرکردەکانی ئێرانیان پێبدات

پەیام 

وەزارەتی دەرەوەی ئەمریكا بە فەرمی رایگەیاند، 10 ملیۆن دۆلار وەك پاداشت بە هەر كەسێك دەدات كە شوێنی سەرکردەکانی ئێرانیان پێبدات. 

 وەزارەتی دەرەوەی ئەمریكا ئەمڕۆ بڵاویکردووەتەوە، بڕی 10 ملیۆن دۆلار بە هەر كەسێك دەدات كە شوێنی موجتەبا خامنەیی رابەری باڵای كۆماری ئیسلامی ئێران ئاشكرا بكات و زانیاری لەبارەیەوە بە ئەمریكا بدات. 

پێدانی پاداشتەكە لە چوارچێوەی پرۆگرامی پاداشت لە پێناو دادپەروەری دێت Rewards for Justice كە بە كورتكراوەی "RFJ" دەناسرێت.

وەزارەتی دەرەوەی ئەمریكا دووپاتیكردووەتەوە، هەمان بڕە پارە پاداشتە بۆ ئەوەی شوێنی 9 بەرپرسی تری ئێران ئاشكرا بكات كە ئەوانیش بریتین لە: عەلی لاریجانی ئەمینداری گشتی ئەنجوومەنی باڵای ئاسایشی نەتەوەیی، ئەسكەندەر موئمینی وەزیری ناوخۆی ئێران،ئیسماعیل خەتیب وەزیری هەواڵگری، عەلی ئەسغەر حیجازی جێگری سوپاسالار. یەحیا رەحیم سەفەوی راوێژكاری سەربازی رابەری باڵا.

وەزارەتی دەرەوەی ئەمریكا چوار كەسی تری دەستنیشان كردووە بەڵام تەنیا پۆستەكانی نووسیوە ئەوانیش: سكرتێری ئەنجوومەنی بەرگری، راوێژكاری رابەری باڵا، فەرماندەی سوپای پاسداران، سەرۆكی نووسینگەی سەربازی.