لە ماوەی دوو ڕۆژدا ١٦ ھێرشکراونەتە سەر شاری سلێمانی و شارۆچکەی کۆیە

دەزگای ئاسایشی یەکێتیی نیشتمانیی کوردستان ڕایگەیاند کە ڕۆژانی ١٧ و ١٨ی ئەم مانگە بە ئاراستەکردنی مووشەک و دڕۆن، ١٦ ھێرش کراونەتە سەر شاری سڵیمانی و شارۆچکەی کە زۆربەی مووشەک و دڕۆنەکان لە ئاسمان تێکشکێنراون.
دەزگاکە لە ڕاگەیاندراوێکدا، ئاماری ھێرشی دوو ڕۆژی سەر شاری سلێمانی و شارۆچکەی کۆیە، بڵاوکردەوە.
بەپێی ڕاگەیاندراوەکە ڕۆژی ١٧ی ئەم مانگە بە ئاراستەکردنی سێ دڕۆن و دوو مووشەک، ھێرشکراوەتە سەر بارەگای ھێزەکانی ٧٠ لە شاری سلێمانی و بەھۆیەوە دوو پێشمەرگە بە سووکی برینداربوون.
لە ڕاگەیاندراوەکەدا باس لەوەش کراوە کە ھەر ڕۆژی ١٧ی ئەم مانگە، دوو دڕۆن ئاراستەی کەمپی پەناران لە شارۆچکەی کۆیە کراون.
ئاماژە بەوەشدراوە کە دوو کارمەندی ئاگرکوژێنەوەی خەلیفان لە کاتی جێبەجێکردنی ئەرک و فەرماندا، بە سووکی برینداربوون.
ھەروەھا دەزگای ئاسایشی یەکێتیی نیشتمانیی کوردستان لە ڕاگەیاندراوەکەدا ئەوەشی خستووەتەڕوو کە ڕۆژی ١٨ی ئەم مانگە، بە ئاراستەکردنی دوو دڕۆن ھێرشکراوەتە سەر بارەگای ھێزەکانی ٧٠ لە شاری سلێمانی.
ڕاشیگەیاندووە ھەر ڕۆژی ١٨ی ئەم مانگە، دڕۆنێک ئاراستەی سەنتەری شارۆچکەی کۆیە و ھاتووە: "تائێستا بە ئاراستەکردنی دڕۆن، شەش ھێرش کراونەتە سەر کەمپی پەنابەران لە شارۆچکەی کۆیە".
ھەر بەپێی ڕاگەیاندراوەکە، ھێرشەکان ھیچ زیانێکی گیانیان نەبووە و زۆربەی مووشەک و دڕۆنەکان لەئاسمان تێکشکێنراون.