ئه‌مریكا: فڕۆكه‌وانی ئه‌و فڕۆكه‌یه‌ی له‌ ئێران پێكرا سه‌لامه‌ته‌

په‌یام

سوپای پاسداران ڕایگەیاند فڕۆکەیەکی F-٣٥ی ئەمریکییان لە ئاسمانی ئێران پێکاوە، لە بەرامبەردا واشنتن نیشتنەوەی ناچاریی فڕۆکەکە و سەلامەتی فڕۆکەوانەکەی لە بنکەیەکی سەربازییدا ڕاگەیاند. 
ئاژانسی "فارس" ی ئێرانی گرتە ڤیدیۆیەکی بڵاو کردەوە و تێیدا ئاماژەی بەوە کردووە کە فڕۆکەیەکی جەنگیی ئەمریکی لە جۆری F-٣٥ بە وردی کراوەتە ئامانج و پێکراوە کە تێچوەکەی ١٠٠ ملیۆن دۆلارە. 
هێزی ئاسمانیی سوپای پاسداران ڕایگەیاندووە کە فڕۆکەکە لە ئاسمانی ناوەڕاستی ئێران تووشی زیانی گەورە بووە و ئەگەری کەوتنەخوارەوەی زۆرە، هەروەها جەختیان کردەوە کە سیستمێکی بەرگریی ئاسمانیی پێشکەوتوویان لەم هێرشەدا بەکارهێناوە. 
لای خۆیەوە، وتەبێژی فەرماندەیی ناوەندیی ئەمریکا (سێنتکۆم) ڕایگەیاند کە ئاگاداری ڕاپۆرتەکانن و فڕۆکەیەکی F-٣٥ دوای گەشتێکی بەسەر ئاسمانی ئێراندا، لە بنکەیەکی ناوچەکە بە ناچاری نیشتووەتەوە. 
ئاماژەی بەوەش کردووە کە فڕۆکەوانەکە بارودۆخی جێگیرە و لێکۆڵینەوە لە هۆکاری ڕووداوەکە بەردەوامە. 
تۆڕی CNN لە زاری سەرچاوەکانییەوە بڵاوی کردووەتەوە کە پێدەچێت فڕۆکەکە بە تەقەی ئێرانییەکان پێکرابێت، ئەمەش یەکەمین ڕووداوی لەو شێوەیەیە لە سەرەتای هەڵگیرسانی جەنگەکەوە لە مانگی شوباتدا. 
هاوکات لەگەڵ ئەم پەرەسەندنانە، لە ماوەی هەفتەی ڕابردوودا چەند ڕووداوێکی دیکەی ئاسمانی ڕوویانداوە؛ لەوانە کەوتنەخوارەوەی فڕۆکەیەکی سووتەمەنی جۆری KC-١٣٥ لە ڕۆژئاوای عێراق کە بووە هۆی گیانلەدەستدانی شەش سەرنشینەکەی، هەروەها بەرگری ئاسمانی کوێت سێ فڕۆکەی F-١٥ی ئەمریکییان بە هەڵە پێکاوە و فڕۆکەوانەکان بە سەلامەتی ڕزگاریان بووە.