ئیسرائیل: دوو ناوه‌ندی به‌رهه‌مهێنانی مووشه‌كمان له‌ تاران بۆردومان كرد

په‌یام

سوپای ئیسرائیل ڕایگەیاند کە لە هێرشێکی ئاسمانیی ورددا، دوو ناوەندی سەرەکیی بەرهەمهێنانی مووشەکی کروزی دەریایی سەر بە وەزارەتی بەرگریی ئێرانی لە تاران پێکاوە و زیانی گەورەی بە ژێرخانی سەربازیی ئەو وڵاتە گەیاندووە. 

سوپای ئیسرائیل ئەمڕۆ چوارشەممە ئاشکرای کرد کە فڕۆکە جەنگییەکانیان، بە ڕێنوێنیی وردی هەواڵگریی سەربازی، دوو دامەزراوەی ستراتیژییان لە جەرگەی تاران کردووەتە ئامانج. ئەم دوو پێگەیە بە سەرچاوەی سەرەکیی دروستکردنی مووشەکی کروزی دەریایی دادەنرێن و ڕاستەوخۆ لەلایەن وەزارەتی بەرگریی ئێرانەوە سەرپەرشتی دەکران، کە ئامانج لێیان پەرەپێدانی توانای سەربازیی تاران بووە بۆ هەڕەشەکردن لە ئامانجە دەریایی و وشکانییەکان. 

بەگوێرەی ڕاگەیەندراوی فەرمیی سوپای ئیسرائیل، ئەو دوو ناوەندە کە لە چەند ڕۆژی ڕابردوودا کراونەتە ئامانج، ڕۆڵی گرنگیان هەبووە لە بەرهەمهێنانی مووشەکی دوورهاوێژ کە توانای تێکشکاندنی خێرای ئامانجەکانیان هەیە. ئیسرائیل جەخت دەکاتەوە کە ئەم هێرشانە بە وردی پلانیان بۆ داڕێژراوە تا ژێرخانی سەربازیی ئێران لە پەل و پۆ بخەن، بە تایبەت ئەو بەشانەی کە پەیوەندییان بە تەکنۆلۆژیای پێشکەوتووی مووشەکی و پیشەسازیی بەرگرییەوە هەیە. 

لە کۆتایی ڕاگەیەندراوەکەدا هاتووە کە ئەم ئۆپراسیۆنە بووەتە هۆی گەیاندنی "زیانی فراوان" بە توانا پیشەسازییەکانی سیستەمی فەرمانڕەوایی ئێران.