ڤانس: لوبنان به‌شێك نیه‌ له‌ ئاگربه‌ست

په‌یام

جەی دی ڤانس، جێگری سەرۆکی ئەمریکا هۆشداریی توند دەداتە ئێران و ڕایدەگەیەنێت، نابێت تاران هێرشەکانی ئیسرائیل بۆ سەر لوبنان بکاتە بیانوو بۆ پاشەکشە لە ڕێککەوتنی ئاگربەست، ئەگەرنا ڕووبەڕووی بژاردەی سەربازیی ترەمپ دەبنەوە. 

جەی دی ڤانس، جێگری سەرۆکی ئەمریکا لە لێدوانێکی ڕۆژنامەوانیدا لە هەنگاریا، ڕایگەیاند، واشنتن هەرگیز لوبنانی وەک بەشێک لە ڕێککەوتنی ئاگربەست هەژمار نەکردووە. ئەم لێدوانانەی ڤانس تەنیا چەند ڕۆژێک بەرلە بەڕێوەچوونی دانوستانە چاوەڕوانکراوەکانی لەگەڵ لایەنی ئێرانی لە وڵاتی پاکستان دێت. 

ڤانس جەختی لەوە کردەوە کە پێویستە ئێرانییەکان بە جیدییەتەوە بێنە سەر مێزی گفتوگۆ، چونکە شکستهێنانی دانوستانەکان بەهۆی دۆخی لوبنانەوە تەنیا بژاردەی تاران خۆیەتی و پەیوەندی بە ناوەڕۆکی ڕێککەوتنەکەوە نییە. ئاماژەی بەوەش کرد، تاران پێشتر بەڵێنی کردنەوەی گەرووی هورمزی داوە و لە بەرانبەردا ئیسرائیلییەکان هەوڵ دەدەن زەمینەیەکی گونجاو بۆ سەرکەوتنی پرۆسەی سیاسی لەگەڵ ئێران بڕەخسێنن. 

لە لایەکی دیکەوە، جێگری سەرۆکی ئەمریکا هۆشداریی دا لەوەی هەر پێشێلکارییەک یان کشانەوەیەک لە لایەن ئێرانەوە، "ئەنجامی کوشندەی" دەبێت. ڕاشیگەیاند، ئەگەر تاران هەنگاوی پێویست نەنێت، ئەوا سەرۆک دۆناڵد ترەمپ بژاردەی گەڕانەوە بۆ جەنگی لەبەردەستە.