گرووپە چەكدارەكان لە عێراق هێرشەکانیان بۆ سەر بەرژەوەندییەکانى ئەمریكا ڕادەگرن

پەیام

بە پێی سەرچاوەیەك لە چوارچێوەی هەماهەنگەوە، هادی عامری سەركەوتوو بووە لە ڕازیكردنی گرووپە چەكدارەكان بۆ ڕاگرتنی هێرشەكانیان لە دژی هێز و بەرژەوەندیەكانی ئەمریكا لە عێراق.

عامر فایز، سەرۆكی هاوپەیمانیی "تەسنیم" و ئەندامی چوارچێوەی هەماهەنگی ئاشكرای كرد كە ئەو لیژنەیەی بە سەرۆكایەتیی هادی عامری ڕاسپێردرابوو بۆ گفتوگۆ لەگەڵ گروپە چەكدارەكان، سەركەوتوو بووە لە ئەركەكەیدا. 

بەپێی مەرجەكانی ئاگربەستەكە، گروپە چەكدارەكان هێرشەكانیان بۆ سەر بەرژەوەندییەكانی ئەمریكا و نێردە دیپلۆماسییەكان ڕادەگرن، لە بەرامبەردا دەبێت ئەمریكا و ئیسرائیل پابەند بن بەوەی درێژە بە هێرشە سەربازییەكانیان نەدەن و چیتر بارەگاكانی حەشدی شەعبی و گروپە چەكدارەكان نەكەنە ئامانج.

ئەم ڕێككەوتنە دوای هەوڵە چڕەكانی هادی عامری دێت كە لە پێنجی نیسانەوە بۆ قایلكردنی سەركردەكانی "كەتائیبی حزبوڵا" و "نوجەبا" دەستی پێكردبوو، وەك هەوڵێك بۆ هێوركردنەوەی ئەو گرژییەی بەهۆی بۆردومانە ڕۆژانەكانی ئەمریكا و هێرشە درۆنییەكانی گروپەكان بۆ سەر باڵیۆزخانەی بەغداد و كونسوڵخانەی هەولێر دروست بووبوو. فایز جەختی كردەوە كە گروپە چەكدارەكان ئامادەن دوای كۆتاییهاتنی وادەی ئاگربەستەكەش پابەند بن.