بەشێک لە گرووپە چەكدارەکانی عێراق بە مەرج ئامادەن چەكەكانیان ڕادەست بكەن

پەیام

شەش گرووپی چەكداری عێراقی ڕەتیان كردەوە چەكەكانیان ڕادەستی حكومەت بكەن و مەرجی نەمانی "داگیركاریی بیانی"یان بۆ ئەو هەنگاوە داناوە.

دوای ئەوەی "سەرایای سەلام"ی سەر بە موقتەدا سەدر چەكەكانی ڕادەستی حكومەت كرد، كەتائیبی حزبوڵڵا و پێنج گرووپی دیكەی نێو "بەرگری ئیسلامی لە عێراق" ئەم هەنگاوەیان ڕەتكردەوە. 

ئەبو موجاهید عەساف، بەرپرسی ئەمنی كەتائیبی حزبوڵڵا ڕایگەیاند، تا ئەو كاتەی "داگیركاری بیانی" لەسەر خاك و ئاسمانی عێراق هەبێت، چەكەكانیان ڕادەست ناكەن و ئەركەكانیان بەردەوام دەبێت.

ئەو شەش گرووپەی ئامادە نین چەك دابنێن بریتین لە: كەتائیبی حزبوڵڵا، كەتائیبی سەیدولشوهەدا، بزووتنەوەی نوجەبا، سەرایای ئەولیا ئەلدەم، ئەسحابل كەهف و كەتائیبی كەربەلا. 

عەساف ئاماژەی بەوەش كرد، ئەو لایەنانەی چەكیان داناوە بەشێك نەبوون لە "بەرگری ئیسلامی". 

لە بەرامبەردا، تا ئیستا تەنیا سێ گرووپ ڕەزامەندییان نیشان داوە بۆ ڕادەستكردنی چەكەكانیان، ئەوانیش: "سەرایای سەلام، عەسائیبی ئەهلی حەق و كەتائیبی ئیمام عەلی"ن، كە ئەمەش وەك بەشێك لە ستراتیژیی حكومەت بۆ كۆكردنەوەی چەك لە دەستی دەوڵەتدا دەبینرێت.