عێراق.. گەڕانەوەی 18 هەزار حاجی لە دەروازەی عەرعەرەوە كۆتایی هات

پەیام

یەكەم كاروانی حاجییانی سلێمانی گەڕانەوە.دەستەی دەروازە سنوورییەكان ڕایگەیاند، گەڕانەوەی زیاتر لە 18 هەزار حاجی لە ڕێگەی دەروازەی عەرعەرەوە بەبێ هیچ گرفتێك كۆتایی هات.

دەستەی دەروازە سنوورییەكانی عێراق ئەمڕۆ هەینی ڕایگەیاند، پڕۆسەی گەڕانەوەی حاجیانی عێراقی لە ڕێگەی دەروازەی سنووریی "عەرعەر"ـەوە بە سەركەوتوویی تەواو بووە. 

بەپێی ئامارە فەرمییەكان، تا ئێستا 18 هەزار و 746 حاجی، لەگەڵ نزیكەی 600 ئەندامی تیمی پزیشكی و كارگێڕی لەو دەروازەیەوە لەماوەی چوار ڕۆژی ڕابردوودا گەڕاونەتەوە خاكی وڵات.

عومەر عەدنان وائیلی، سەرۆكی دەستەی دەروازە سنوورییەكان ئاماژەی بەوە كرد، پڕۆسەكە بۆ ماوەی چوار ڕۆژی بەردەوام و بەشێوەی 24 كاتژمێری بەڕێوە چووە. 

جەختیشی كردەوە، بەهۆی هەماهەنگیی توندوتۆڵی نێوان دامەزراوەكان، هیچ دواكەوتن و گرفتێك لە ڕێكارەكاندا ڕووی نەداوە. 

ئەم هەنگاوە لە چوارچێوەی ڕێنماییەكانی حكومەت دێت بۆ دابینكردنی باشترین خزمەتگوزاری بۆ حاجیان و ئاسانكاری لە گەڕانەوەیاندا. 

وائیلی دەستخۆشی لە كارمەندان كرد كە توانیویانە بەوپەڕی ڕێكخراوەییەوە پێشوازی لە میوانانی ماڵی خوا بكەنەوە.

بەیانیی ئەمڕۆیش یەكەم كاروانی حاجییانی پارێزگای سلێمانی لە ڕێگەی فڕۆكەوە گەڕانەوە، پاش ئەوەی دوێنێ‌ یەكەم كاروانی حاجییانی هەولێر گەڕانەوە.