ئه‌ورووپا: هه‌ڵمه‌تی كۆكردنه‌وه‌ی واژوو بۆ هه‌ڵوه‌شاندنه‌وه‌ی ڕێكه‌وتنه‌ هاوبه‌شه‌كان به‌ڕێوه‌ده‌چێت

په‌یام

هەڵمەتێکی واژۆکۆکردنەوە لە ناو وڵاتانی یەکێتیی ئەوروپا بۆ ڕاگرتنی تەواوەتیی ڕێککەوتنی هاوبەشی لەگەڵ ئیسرائیل، بەربەستی ملیۆنێک واژۆی تێپەڕاند، ئەمەش وەک ناڕەزایەتییەک بەرانبەر بە "جەنگی کۆمەڵکوژی" و پێشێلکارییەکانی مافی مرۆڤ لە کەرتی غەززە. 

بەپێی زانیارییەکانی دەستپێشخەریی هاووڵاتیانی ئەوروپا، ژمارەی واژۆکان گەیشتووەتە یەک ملیۆن و حەوت هەزار کەس، کە ئەمەش ڕێژەی یاسایی پێویست بۆ بەفەرمیکردنی داواکارییەکە تێدەپەڕێنێت. 

ئەم هەڵمەتە کە تەنیا لە ماوەی سێ مانگدا ئەم ئەنجامەی بەدەستهێناوە، داوا دەکات سەرجەم پەیوەندییە بازرگانی و ئابوورییەکان لەگەڵ تەلئەبیب ڕابگیرێن، چونکە ڕێککەوتنی هاوبەشی کە بنەمای پەیوەندییەکانی نێوان هەردوولایە، بە پێچەوانەی بەها بنەڕەتییەکانی یەکێتیی ئەوروپا دەبینرێت لە کاتێکدا ئیسرائیل تۆمەتبارە بە ئەنجامدانی تاوانی جەنگ و کۆمەڵکوژی. 

لە ناوەڕۆکی داواکارییەکەدا هاتووە کە ئیسرائیل بەرپرسیارە لە کوشتن و ئاوارەکردنی مەدەنییەکان و وێرانکردنی سیستماتیکی نەخۆشخانەکان، جگە لە بەکارهێنانی برسیێتی وەک چەکێکی جەنگ و پشتگوێخستنی بڕیارەکانی دادگای دادی نێودەوڵەتی. واژۆکەران داواش لە یەکێتی ئەوروپا دەکەن پێشنیازێکی فەرمی پێشکەشی ئەنجوومەنی ئەوروپا بکات بۆ هەڵوەشاندنەوەی یەکجاریی ئەو ڕێککەوتنە لەگەڵ ئیسرائیل.