سلێمانى.. دایکێکی دووگیان و کۆرپەکەی لە مردن ڕزگار کران

پەیام

لە نەخۆشخانەی شار دایکێکی دووگیان و کۆرپەکەی لە مردن ڕزگار کران ئەمەش دواى ئەوەى تووشی ڕووداوێکی سەختی هاتوچۆ بوو بوو.

بەڕێوبەرایەتی گشتی تەندروستی سلێمانی بڵاویکردەوە، تیمە پزیشکییەکانی نەخۆشخانەی شاری فریاکەوتنی فێرکاری لە سلێمانی توانییان لە ڕێگەی نەشتەرگەرییەکی فریاگوزاریی بەپەلەوە، ژیانی کۆرپەیەکی ٣٧ هەفتەیی و دایکی لە مردن ڕزگار بکەن، دوای ئەوەی دایکەکە تووشی ڕووداوێکی سەختی هاتوچۆ بوو بوو.

ئەوەش خراوەتەڕوو "ئافرەتێکی دووگیان کە تەمەنی کۆرپەکەی ناو سکی ۳۷ هەفتە (نزیکەی کۆتایی مانگی نۆیەم) بووە، بەهۆی توشبوونی بە ڕووداوێکی سەختی هاتوچۆوە، بەپەلە و بە برینداری گەیەندراوەتە بەشی فریاکەوتنی نەخۆشخانەی گشتیی شار، بەهۆی مەترسی ڕووداوەکە لەسەر ژیانی دایکەکە و کۆرپەکەی دەستبەجێ پەیوەندیکرا بە نەخۆشخانەی منداڵبوونی سلێمانییەوە و لەوێوە تیمێکی بە ئەزموون و بەسەرپەرشتی پزیشکێکی پسپۆڕ بە سێتی نەشتەرگەری تەواوە گەیشتنە نەخۆشخانەی شار.

بەڕێوبەرایەتی  تەندروستی سلێمانی، ئاماژەى بەوەشکردووە "بەهۆی هەستیاریی دۆخی کۆرپەکەوە، بڕیاری نەشتەرگەریی فریاگوزاریی خێرا درا و خۆشبەختانە تیمە پزیشکییەکە توانییان بە سەرکەوتوویی منداڵەکە لە سکی دایکی دەربهێنن و ژیانی لە مەترسی ڕزگار بکەن".

باسى لەوەشکردووە "دوای دڵنیابوونەوە لە جێگیربوونی دۆخی تەندروستیی کۆرپە نوێبووەکە، قۆناغی دووه‌می فریاگوزارییەکە دەستیپێکرد. تیمەکانی بەشی شکاوی و نەشتەرگەریی گشتی چوونە ناو پرۆسەکەوە و نەشتەرگەرییەکی تریان بۆ چارەسەرکردنی ئەو شکاوییانە ئەنجامدا کە بەهۆی ڕووداوەکەوە شکاوی لە ڕانی دایکەکەدا دروستببوون".