به‌ بیانووی نه‌بوونی داهات هه‌موو پڕۆژه‌كانی سنووری سلێمانی، راگیراون

پەیام 

عه‌لی‌ حه‌مه‌ ساڵح بڕیارده‌ری‌ ره‌وتی‌ هه‌ڵوێست له‌ راگه‌یه‌ندراوێكدا دەڵێت، "به‌ بیانووی نه‌بوونی داهات هه‌موو پڕۆژه‌كانی سنووری سلێمانی، ١٠٠% راگیراون".

دەشڵێت، "چەندین پرۆژە ٨٠٪ ى تەواوبووە ڕاگیراوە، تەنانەت”نەسریەی” فەرمانگەکانی ئەو سنوورە ڕاگیراوە، گرفتی دەرمان و ئامێری تەندروستی هەیە لە نەخۆشخانەکان". 

ئەمەش دەقى ڕاگەیەندراوەکەیە:-

ڕاگەیەندراو 
بەبەهای (٤ ترلیۆن ٥٥٠ ملیار) دینار بڕیاری پرۆژە دراوە لە سنوری سلێمانی (ڕێگاوبان و بەنداو، پرد، گەیاندنی پرۆژەی ئاو… هتد) لە گەرمیانەوە بۆ هەڵەبجە و  پێنجوێن و سلێمانی  هەتا ڕاپەڕین و چەمچەماڵ و دەربەندیخان و سەیدسادق….. هەموو پرۆژەکانی سنوری سلێمانی ١٠٠٪ ڕاگیراون!  

تەنانەت چەندین پرۆژە ٨٠٪ تەواوبووە ڕاگیراوە، تەنانەت”نەسریەی” فەرمانگەکانی ئەو سنوورە ڕاگیراوە، گرفتی دەرمان و ئامێری تەندروستی هەیە لە نەخۆشخانەکان. 

بیانوو نەبوونی داهاتە. 
بەپێی ڕێککەوتنێکی ١٢ ساڵ پێش ئێستا، پرۆژەو نەسریەو دەرمان و پاککردنەوە هەر سنورە لە داهاتی خۆیەتی..

پێشتر داهاتی سنوری سلێمانی( ١٥٠بۆ ١٦٠) ملیار دیناربوە! ئێستا دەڵێن: بەداهاتی کارەباشەوە مانگی پێشوو (٣٩ ملیار) دیناربوە!! بۆ بۆ! 

ناکرێت داهاتی قاچاخچێتی لە باشماخ و پەرێزخان سێ هێندەی داهاتی فەرمی ئەو گومرگانە بێت بۆ خەڵک! ناکرێت داهاتی سەرانەی بازگەی حیزب زیاتر بێت لە داهاتی گومرگ و مرور! 

خۆتان باوەڕ بەمە دەکەن داهاتی هاتوچۆو شارەوانی و گومرگ و باج و کارەبای ڕوناکی و دەیان ڕسومات (٣٩ ملیار) دینار بێت! 

کەی ڕەوایە بەهای ملیارەها دۆلار زەویتان بردبێت بۆ خۆتان، بەڵام هەرچێ پرۆژەیە وەستابێت! 

ئەمەی لێرە ڕودەدات، کارەساتە و تاڵانیە! نادادیە…

تکایە تۆمەت دروست مەکەن، ئەمە زیانگەیاندنە بە سلێمانی، ئەمە داڕوخاندنی ئەم شارە جوانەیە!

بەکڕینی میدیاو نوسەرو دانانی دەزگاو کەناڵ و خەرجکردنی ملیۆن دۆلار ئەم دۆخە خراپەی سلێمانی داناپۆشرێت!! 

ئەوەی دڵسۆزی ئەم شارەبێت قسە دەکات و دەنگی بەرز دەبێت.