حزبی دیموكرات: هێرشەکانى ئەمڕۆ سێ شەهید و ژمارەیەك بریندارى لێکەوتووەتەوە

پەیام 

حزبی دیموكراتی كوردستانی ئێران شەهیدبوونی سێ كەس و برینداربوونی دووانی دیكەی لە دوو هێرشی مووشەكی و فڕۆكەی بێفڕۆكەواندا بۆ سەر كەمپەكانیان لە پارێزگای هەولێر ڕاگەیاند.

لە ڕاگەیەنراوێكدا لەوبارەوە، هەژماری حزبی دیموكراتی كوردستانی ئێران بڵاوی كردەوە: هێرشی درۆنیی كۆماری ئیسلامیی ئێران بۆ سەر كەمپە مەدەنییەكانی حزبی دیموكراتی كوردستانی ئێران لە هەرێمی كوردستان شەهید و برینداری لێ كەوتەوە.

حزبی دیموكراتی كوردستانی ئێران ڕایشیگەیاند: دوانیوەڕۆی ڕۆژی هەینی بە مووشەك و درۆن ئێران شەپۆلێكی نوێی هێرشی كردەوە سەر كەمپە مەدەنییەكانی حیزبی دیموكراتی كوردستانی ئێران و، بەو هۆیەوە باوك و كوڕێك بە ناوەكانی (شاهین ئازەربەرزین) و (نادر ئازەربەرزین) شەهید و بریندار بوون.

بە پێی زانیارییەكان، هێرشە درۆنییەكە كراوەتە سەر كەمپێكی ئەو حزبە لە سنووری قەزای بەحركە لە پارێزگای هەولێر.

لە هێرشێكی دیكەیشدا كە ڕاگەیەنراوەكەی حزبی دیموكراتی كوردستان ئاماژەی بۆ كردووە، لە سنووری ناحیەی سیدەكان هەر لە پارێزگای هەولێر هێرش كراوەتە سەر پۆلێك پێشمەرگەی ئەو حزبە و دوو پێشمەرگەی كچ بە ناوەكانی (نەدا میری) و (سەمیرا ئەڵڵایاری) شەهید و چەند پێشمەرگەیەكی دیكەیش بریندار بوون.