هۆشداری لە دانیشتوانی باشووری لوبنان دەدرێت لە گەڕانەوە بۆ ناوچەکانیان

پەیام

سوپای ئیسرائیل هۆشداری دەداتە دانیشتووانی باشووری لوبنان لە گەڕانەوە بۆ گوندەکانیان و نزیکبوونەوە لە ڕووباری لیتانی، هاوکات میدیاکانی ئەو وڵاتەش باس لە بەردەوامیی ئۆپەراسیۆنە سەربازییەکان و دروستکردنی بنکەی سەربازی نوێ دەکەن. 
سوپای ئیسرائیل لە پەیامێکی نوێدا هۆشداریی توندی ئاراستەی هاووڵاتییانی لوبنانی کرد و داوای لێکردن نەگەڕێنەوە بۆ کۆمەڵێک گوند و شارۆچکەی سنووری لە باشووری وڵاتەکە. سوپای زایۆنی جەختی کردووەتەوە کە پێویستە دانیشتووان لە ناوچەی ڕووباری لیتانی و دەوروبەری دوور بکەونەوە و مەترسی لەسەر ژیانیان دروست نەکەن. 
لە لایەکی دیکەوە، کەناڵی ١٢ی ئیسرائیلی لە زاری سەرچاوەیەکی فەرمییەوە بڵاوی کردەوە، سوپای ئیسرائیل بەنیازی دامەزراندنی ٢٠ پێگەی سەربازیی نوێیە لە ناوچەکانی باشووری لوبنان. ئەم هەنگاوە وەک بەشێک لە پلانی جێگیرکردنی هێزەکان لە ناوچە ستراتیژییەکاندا هەژمار دەکرێت. 
هەر لەو چوارچێوەیەدا، سەرچاوە ئیسرائیلییەکە ئاماژەی پێ کردووە کە سەرەڕای ڕاگەیاندنی ئاگربەست، بەڵام ئۆپەراسیۆنە سەربازییەکانی سوپای ئیسرائیل لە ناوچەکەدا بەردەوامن و هێزەکانیان لە حاڵەتی ئامادەباشیدان بۆ ڕووبەڕووبوونەوەی هەر پێشهاتێکی ئەمنی.