05/06/2026
323 جار خوێنراوەتەوە
ئێران: دوو تێكشكێنەری ئەمریكیمان ناچار كرد دەریای عومان جێبهێڵن
پەیام
سوپای ئێران ڕایگەیاند، بە مووشەك و درۆن ڕووبەڕووی كەشتییە جەنگییەكانی ئەمریكا بوونەتەوە و دوو تێكشكێنەریان ناچار كردووە دەریای عومان جێبهێڵن.
سوپای ئێران ڕاگەیەندراوێكی سەبارەت بە ئەنجامدانی ئۆپراسیۆنێكی دەریایی دژی جووڵەكانی ئەمریكا لە دەریای عومان بڵاو كردەوە، بەپێی ڕاگەیەندراوەكە، هێزەكانی ئێران تەقەی ئاگاداركردنەوەیان بۆ بەرپەرچدانەوەی "كردەوە دوژمنكارانەكانی ئەمریكا" و ڕێگریكردن لە بێزاركردنی كەشتییە بازرگانی و نەوتهەڵگرەكان ئەنجام داوە.
لەو ئۆپراسیۆنەدا، سوپای ئێران مووشەكی جۆری "قەدیر" و فڕۆكەی بێفڕۆكەوانی هێرشبەری نوێی جۆری "شەهید دانا"ی بەكارهێناوە.
ئێران دەڵێت توانیویانە دوو تێكشكێنەری ئەمریكی بە ناوەكانی "DDG 103" و "DDG 87" ناچار بكەن دەریای عومان بەرەو ئۆقیانووسی هیندی جێبهێڵن.
سوپای ئێران هۆشداریی داوەتە واشنتۆن كە كۆتایی بە "چەتەیی دەریایی" و ڕەفتارە دوژمنكارییەكانی بهێنێت و جەختی كردووەتەوە، دووریی كەشتییە ئەمریكییەكان ڕێگر نییە لە بەكارهێنانی مووشەكی دوورهاوێژتر لە كاتی پێویستدا بۆ پاراستنی سەروەریی دەریایی خۆیان.
لە تۆڕە کۆمەڵایەتیەکان شەیری بکە