وا بڕیاره‌ سبه‌ینێ گه‌ڕێكی دیكه‌ی دانووستانی ئه‌مریكا و ئێران به‌ڕێوه‌بچێت

شاندی ئەمریکا بۆ بەشدارى لە گەڕی دووەمی دانوستانەکان لەگەڵ ئێران، بەرەو پاکستان بەڕێ کەوتووە و باسیش لەوە دەکرێت کە سبەی دانوستان بەڕێوە بچێت. 

ڕۆژنامەی وۆڵ ستریت جۆرناڵی ئەمریکی بڵاوی کردووەتەوە، کە شاندی دانوستانکاری ئەمریکی بە سەرۆکایەتی جەی دیڤانس و ئەندامێتی ویتکۆف و کوشنەر بەرەو پاکستان بەڕێکەوتوون و ئێوارەی ئەمڕۆ دەگەنە ئیسلام ئاباد بە مەبەستی ئەنجامدانی گەڕی دووەمی دانوستانەکان لەگەڵ ئێران، پێشتریش دوو فڕۆکەی ئەمریکی بۆ ئامادەکاری ئەمنیی و ئەکنیکی گەیشتبوونە وڵاتەکە و ئەمڕۆیش فڕۆکەیەکی دیکەی شاندەکە گەیشتووە، بەڵام نازانرێت ئایا ئەندامانی شاندەکە بوون یان نا. 

 ئاژانسی ئەنادۆڵۆ لە سەرچاوە پاکستانییەکانەوە گواستوویەتییەوە کە، شاندە باڵاکەی ئەمریکا بۆ بەشداریکردن لە دووەمین خولی دانوستانەکان لەگەڵ تاران گەیشتوونەتە ئیسلام ئاباد و سەردانەکەیان بە هەنگاوێکی گرنگ ناو برد بۆ شکاندنی بەستەڵەکی دیپلۆماسیی نێوان هەردوو وڵات. 

لای خۆیشەوە عەباس عەراقچی وەزیری دەرەوەی ئێران لە پەیوەندییەکی تەلەفۆندیا لەگەڵ هاوتا پاکستانییەکەی ڕایگەیاندووە هەڕەشە و داواکارییە نالۆژیکییەکانی واشنتن بەڵگەن لەسەر جددی نەبوونی لە دانوستانەکاندا و جەختی لەوە کردەوە کە بۆ پاراستنی بەرژەوەندییەکان و ئاسایشی نەتەوەیی، تاران هەموو تواناکانی بەکار دەهێنێت. 
 هەروەها ئەسۆشەیتد پرێس لە زاری سەرچاوەکانییەوە بڵاوی کردووەتەوە کە پاکستان هەوڵەکانی بۆ دەستپێکردنەوەی وتووێژەکان لە سێشەممەدا چڕ کردووەتەوە.