لە ماوەی ٢٤ کاتژمێری ڕابردوودا تەنها ١٢ کەشتی بە گەرووی هورمزدا تێپەڕیون

پەیام

بەرپرسە سەربازییەکانی ئەورووپا هۆشداری لە لێکەوتە کارەساتبارەکانی داخستنی گەرووی هورمز دەدەن و جەخت دەکەنەوە کە کردنەوەی ئەو ڕێڕەوە گرنگە تەنها لە ڕێگەی هاوپەیمانییەکی نێودەوڵەتییەوە دەبێت. 
تۆڕی بلومبێرگ لە زاری چەند بەرپرسێکی سەربازیی ڕۆژئاواییەوە بڵاویکردەوە، پرۆسەی دووبارە کردنەوەی گەرووی هورمز کارێکی ئاڵۆزە و بەبێ پێکهێنانی هاوپەیمانییەکی نێودەوڵەتیی بەهێز جێبەجێ ناکرێت، ئەمەش ئاماژەیە بۆ قەبارەی ئەو ئاڵەنگارییە ئەمنیانەی ڕووبەڕووی ناوچەکە بوونەتەوە. 
لە لایەکی دیکەوە، داتاکانی پێگەی "مارین ترافیک" نیشانی دەدەن کە جووڵەی دەریاوانی لەو ناوچەیەدا بەشێوەیەکی بەرچاو کەمی کردووە، بە جۆرێک لە ماوەی ٢٤ کاتژمێری ڕابردوودا تەنها ١٢ کەشتی بە گەرووی هورمزدا تێپەڕیون، ئەمەش پەککەوتنی یەکێک لە گرنگترین شا دەمارەکانی بازرگانیی جیهانی دەسەلمێنێت. 
هاوکات کۆمیساری گواستنەوەی یەکێتیی ئەورووپا هۆشدارییەکی توندی دا و ڕایگەیاند، ئەگەر ئازادیی هاتوچۆی دەریاوانی بۆ گەرووی هورمز نەگەڕێتەوە، جیهان و ئەورووپا ڕووبەڕووی لێکەوتەی کارەساتبار دەبنەوە. ئاماژەی بەوەش کرد کە ئێستا کار بۆ دۆزینەوەی سەرچاوەی جێگرەوەی سووتەمەنی فڕۆکە دەکەن، لەوانەش پەنابردن بۆ ئەو سووتەمەنییانەی لە ئەمریکا بەرهەم دەهێنرێن.