1 کاتژمێر پێش ئێستا
151 جار خوێنراوەتەوە
ئێران هێرشى سەر زانکۆکانى بە بەڵگەنامە دەکات و دەیداتە دادگا نێودەوڵەتییەكان
پەیام
ئێران سەرقاڵی بەڵگەنامەكردنی هێرشە ئەمریكی و ئیسرائیلییەكانە بۆ سەر زیاتر لە 20 زانكۆ، تاكو لە ڕێگەی دۆسیەیەكی یاساییەوە لە ناوەندە نێودەوڵەتییەكاندا سكاڵایان لە دژ تۆمار بكات.
حسێن ئەفشین، جێگری سەرۆككۆماری ئێران بۆ كاروباری زانست و تەكنەلۆژیا ڕایگەیاند، تاران لە ڕێگەی فەرمانگەی یاسایی سەرۆكایەتی كۆمارەوە كار دەكات بۆ كۆكردنەوەی بەڵگە لەسەر بە ئامانجگرتنی ناوەندە زانستییەكانی وڵاتەكەی لەلایەن ئەمریكا و ئیسرائیلەوە.
لە كاتی سەردانێكیدا بۆ زانكۆی "شەهید بەهەشتی" لە تاران، ئەفشین ئاماژەی بەوە كرد، زیاتر لە 20 زانكۆ و ژمارەیەك لە ئەكادیمییەكان كراونەتە ئامانج، ئەمەش وەك هەوڵێك بۆ لاوازكردنی بنەما زانستی و كولتوورییەكانی ئێران وەسف كرد.
وتیشی: "ئەم هێرشانە تەنها زیانگەیاندنی مادیی نییە، بەڵكو هێرشە بۆ سەر داهاتووی گەشەپێدانی وڵات."
لەلایەكی دیكەوە، حوسێن سیمایی سەڕاف، وەزیری زانست و توێژینەوەی ئێران دووپاتی كردەوە كە تەواوی دۆسیەی "تاوانەكانی دوژمن" لە هێرشكردنە سەر تاقیگە و هۆڵەكانی خوێندن ئامادە كراوە و لەگەڵ كۆتاییهاتنی هێرشە سەربازییەكان، سكاڵای فەرمی لە ناوەندە نێودەوڵەتییەكان تۆمار دەكەن.
لە تۆڕە کۆمەڵایەتیەکان شەیری بکە