بە تۆمەتی هاوكاریكردنی ئێران، ئەمریكا بەرپرسێکى باڵاى عێراقى سزادا

پەیام
 
بە تۆمەتی هاوكاریكردنی تاران و گروپە چەكدارەكان لە فرۆشتنی نەوتی ئێران و تێكدانی ئاسایشی عێراق، ئەمریكا سزای بەسەر جێگری وەزیری نەوتی عێراقدا سەپاند.

ئەمڕۆ وەزارەتی گەنجینەی ئەمریكا گەڕێكی نوێی سزاكانی ڕاگەیاند، كە ئەمجارەیان بەرپرسێكی باڵای حكومەتی عێراقی گرتەوە و نووسینگەی كۆنترۆڵكردنی سەروەت و سامانە بیانییەكان لە وەزارەتی گەنجینەی ئەمریكا ناوی "عەلی مەعڕەج بەهادلی"، جێگری وەزیری نەوتی عێراقی خستە لیستی سزاكانەوە. 

واشنتۆن، بەهادلی تۆمەتبار دەكات بەوەی پۆستە حكومییەكەی بەكارهێناوە بۆ ئاسانكاری لە گواستنەوە و فرۆشتنی نەوت بۆ بەرژەوەندی ڕژێمی ئێران و ئەو گروپە چەكدارییانەی لە ناوخۆی عێراقدا لایەنگری تارانن.

جگە لە جێگری وەزیر، سزاكان سێ سەركردەی باڵای هەریەك لە گرووپە چەكدارەكانی "كەتائیبی سەیدوشوهەدا" و "عەسائیبی ئەهلی حەق" و چوار كۆمپانیای ناوخۆیی عێراقییان گرتووەتەوە. 

بەپێی بەیاننامەكەی وەزارەتی گەنجینەی ئەمریكا، ئەم هەنگاوە لە چوارچێوەی پڕۆسەی ناسراو بە "توڕەیی ئابووری"دایە، كە مەبەست لێی سەپاندنی زۆرترین فشاری داراییە بۆ سەر ئێران و ئەو گرووپانەی ئاسایشی ناوچەكە دەخەنە مەترسییەوە.