ترەمپ: هێرشەکەى سەر ئێران لێدانێكی سووك بووە و ئاگربەست بەردەوامە

پەیام

سەرۆكی ئەمریكا هەڕەشەی بۆردوومانی چڕتر لە ئێران دەكات ئەگەر بە خێرایی ڕێككەوتن واژۆ نەكات، هاوكات پێكدادانەكانی ئەمدواییەی گەرووی هورمز بە "لێدانێكی سووك" وەسف دەكات.

دۆناڵد ترەمپ، سەرۆكی ئەمریكا، هۆشدارییەكی توندی ئاراستەی ئێران كرد و ڕایگەیاند: ئەگەر تاران بە خێرایی ڕێككەوتنی پێشنیازكراو واژۆ نەكات، ڕووبەڕووی بۆردوومانێكی سەختتر دەبێتەوە كە چڕییەكەی لە هەموو جارەكانی پێشوو زیاتر دەبێت. 

ترەمپ لە ڕێگەی سۆشیاڵ میدیای "ترووس"ـەوە نووسی: كۆتاییهاتنی ئۆپەراسیۆنە سەربازییەكان تەنیا بەستراوەتەوە بە ڕەزامەندی ئێران لەسەر ئەو خاڵانەی گفتوگۆیان لەسەر كراوە.

سەرەڕای ئەم هەڕەشانە، ترەمپ لە لێدوانێكدا بۆ كەناڵی ئەی بی سی نیوزی وڵاتەكەی، وتیشی: ئاگربەستەكە هێشتا بەردەوامە، ئەوەی ڕووی داوە لێدانێكی سووك بووە. 

بە پێی قسەی ترەمپ "سێ كەشتی جەنگی ئەمریكی بە سەركەوتوویی لە ژێر بۆردوومانی هێزەكانی ئێران لە گەرووی هورمز دەرچوون و زیانێكی زۆریان بە هێرشبەرە ئێرانییەكان گەیاندووە".