پۆڵەندا دانوستانی چڕ بۆ زیادکردنی هێزەکانی ئەمریکا لە وڵاتەکەی ئەنجام دەدات

په‌یام

پۆڵەندا دانوستان بۆ زیادکردنی هێزەکانی ئەمریکا لە وڵاتەکەی دەکات و ئامادەیی نیشان دەدات بۆ پێشوازیکردن لەو هێزانەی لە ئەڵمانیاوە دەگوازرێنەوە.
باڤڵ زالێڤسکی، جێگری وەزیری بەرگریی پۆڵەندا، لە پەراوێزی کۆبوونەوەی وەزیرانی بەرگریی یەکێتیی ئەوروپا ڕایگەیاند، وڵاتەکەی لە دانوستانی ڕاستەوخۆدایە بۆ بەهێزکردنی هەبوونی سەربازیی ئەمریکا لەسەر خاکەکەی. زالێڤسکی ئاماژەی بەوە کرد کە بەردەوام لەسەر ئەم پرسە لە گفتوگۆدان و لەو چوارچێوەیەشدا لەگەڵ تۆماس دینانۆ، جێگری وەزیری دەرەوەی ئەمریکا، کۆبووەتەوە.
ناوبراو جەختی لەوە کردەوە کە سەرجەم هێزە سیاسییە سەرەکییەکانی پۆڵەندا هاوڕان لەسەر پێویستیی زیادکردنی ژمارەی سەربازانی ئەمریکا. ئاماژەی بەوەش کرد کە لایەنی ئەمریکی ئاگاداری ئەم کۆدەنگییە سیاسییەیە و وارشۆ بە گەرمی پێشوازی لە هەر هێزێکی زیادەی ئەمریکی دەکات کە ڕەوانەی وڵاتەکەیان بکرێت.
ئەم پێشهاتانە دوای ئەوە دێن کە دۆناڵد ترەمپ، سەرۆکی ئەمریکا، بەهۆی هەبوونی ناکۆکی لەگەڵ فریدریچ مێرتز، ڕاوێژکاری ئەڵمانیا، باسی لە ئەگەری گواستنەوەی بەشێک لە هێزەکانی وڵاتەکەی لە ئەڵمانیاوە بۆ پۆڵەندا کردبوو. لە ئێستادا نزیکەی ١٠ هەزار سەربازی ئەمریکی لە ناوچە جیاجیاکانی پۆڵەندا جێگیرکراون.