عێراق مووچەى مانگى پێنج دابەشدەکات و لە هەرێم کاتەکەى نادیارە

پەیام

وەزارەتی دارایی حكوومەتی فیدڕاڵ دەستپێكردنی دابەشكردنی مووچەی مانگی پێنجی مووچەخۆرانی ڕاگەیاند، لە هەرێمى کوردستانیش تائێستا کاتەکەى نادیارە.

لە ڕاگەیەنراوێكدا كە لە پەیجی خۆی لە تۆڕی كۆمەڵایەتی فەیسبووك بڵاوی كردووەتەوە، ڕایگەیاند: لەسەر بڕیار و ئاڕاستەی وەزیری دارایی، لەمڕۆ، شەممەوە دەست بە دابەشكردنی مووچەی مانگی پێنجی مووچەخۆران دەكرێت.

سەبارەت بە هەرێمی كوردستانیش تا ئێستا هیچ ئاسۆیەك بۆ خەرجكردنی مووچەی مانگی پێنج نییە، بەو پێیەی بەستراوەتەوە بە ناردنی داهاتی نانەوتییەوە كە وەزارەتی دارایی هەرێم دەڵێت: تا كۆتایی مانگ بە دیار ناكەوێت.

رۆژى ڕابردووش وەزارەتی نەوتی عێراق لە ڕاگەیەندراوێكدا بڵاوی كردەوە، بەبۆنەی هاتنی جەژنی قوربانی پیرۆزەوە، باسم محەممەد خزەیر، وەزیرەكەی بڕیاری داوە بە خەرجكردنی 100 هەزار دینار وەك "جەژنانە" بۆ سەرجەم فەرمانبەرانی وەزارەتەكەی.

لە هەرێمى کوردستانیش فەرمانبەران نەک جەژنانە وەرناگرن، ماوەى 11 ساڵە کەمترین مووچەیان لە کاتى دیاریکراوى خۆیدا وەرگرتووە، ئەمە جگەلەوەى هەموو فەرمانبەرێک لەماوەى ئەو 11 ساڵەدا 18 مووچەى تەواوى پێنەدراوە و ٤٤ ى دیکەشى بە لێبڕینەوە پێدراوە.