ئۆجەلان: ئیدی ناكرێت حیساب بۆ كورد نەكرێت

پەیام

ڕێبەری زیندانییكراوی پارتی كرێكارانی كوردستان ڕایدەگەیەنێت كە یەكێتیی نەتەوەیی كورد ئامانجێك نییە بە تەنیا لایەنێكی سیاسی بێتە دی. وتیشی: ئەمڕۆ ئیدی ناكرێت حیساب بۆ كورد نەكرێت.

لە وتەیەكیدا بۆ 24هەمین جڤاتی گشتی كۆنگرەی نەتەوەیی كورد (كەنەكە)، عەبدوڵڵا ئۆجەلان ڕێبەری زیندانییكراوی پەكەكە ڕایگەیاند: یەكێتی نەتەوەیی كورد ئامانجێكی وەها نییە كە پارتێك، یان لایەنێكی سیاسی بەتەنیا بیهێنێتە دی، بەڵكوو ئەم یەكێتییە تەنیا دەتوانرێت بە هەوڵی هاوبەشی هەموو هێزەكان، ڕۆشنبیران، ژنان، گەنجان و دینامیكە جڤاكییەكانی كورد بونیاد بنرێت.

لە بەشێكی دیكەی پەیامەكەیدا ئۆجەلان ڕایشیگەیاند: هەر گفتوگۆیەك سەبارەت بە داهاتوو و یەكێتی نەتەوەیی، مافە دیموكراتییەكان و ئیرادەی هاوبەشی گەلی كورد بكرێت، پێگەیەكی گرنگی لە كاروانی مێژوویی گەلەكەماندا دەبێت.

ڕێبەری پەكەكە ڕایشیگەیاند كە ئەمڕۆ گەلی كورد بە قۆناغێكی گرنگی مێژوویی خۆیدا تێدەپەڕێت. كورد كە سەدان ساڵ ڕووبەڕووی سیاسەتی نكۆڵی، لەناوبردن، پارچەكردن و بێ ستاتۆیی بوونەتەوە، ئیدی ناكرێت باس لە هاوكێشەیەكی خۆرهەڵاتی ناوین بكرێت و حیساب بۆ كورد نەكرێت و ئیرادەیان بە نەبوو لەقەڵەم بدرێت.