کایەی ئاسمانیی ئێران کرایەوە

دەسەڵاتی فڕۆکەوانیی مەدەنیی ئێران کایەی ئاسمانیی وڵاتەکەی بەڕووی گەشتە نێودەوڵەتی و ناوخۆیییەکاندا کردەوە، ئەمەش دوای ماوەیەک لە ڕاگرتنی گەشتەکان بەهۆی توندبوونی گرژییە ئەمنییەکانی ناوچەکە لەگەڵ ئیسرائیلدا. 
میدیای فەرمیی ئێران لە زاری بەرپرسانی فڕۆکەوانیی مەدەنییەوە ڕایگەیاند هاتوچۆی ئاسمانی لە سەرانسەری وڵاتەکەدا ئاسایی بووەتەوە و سەرجەم فڕۆکەخانەکان دەستیان بە چالاکییەکانیان کردووەتەوە. ئەم بڕیارە دوای ئەوە هات کە لایەنە پەیوەندیدارەکان دڵنیاییاندا لە دابینکردنی تەواوی مەرجە ئەمنییەکان بۆ سەلامەتیی گەشتەکان. 
پێشتر و لەگەڵ هەڵکشانی ئاڵۆزییە سەربازییەکانی نێوان تاران و ته‌ل ئەبیب، دەسەڵاتدارانی ئێران لەپێناو پاراستنی سەلامەتیی فڕۆکە مەدەنییەکان، سەرەتا گەشتەکانی ناوچەکانی ڕۆژئاوای وڵاتەکەیان و دواتریش سەرجەم ئاسمانی ئێرانیان بەڕووی هاتوچۆی ئاسمانیدا داخستبوو.