كوەیت دژی هێرشەكانی ئێران ناڕەزاییەكی پێشكەشی ڕێكخراوی ئیكاو كرد

پەیام

دژی هێرشە مووشەكییەكانی ئێران بۆ سەر فڕۆكەخانەی نێودەوڵەتی وڵاتەكەی كوەیت بۆ جاری سێیەم بە فەرمی ناڕەزایەتی پێشكەشی ڕێكخراوی "ئیكاو" كرد.

بەهۆی بەردەوامی هێرشەكانی ئێران بۆ سەر فڕۆكەخانەی نێودەوڵەتی كوێت دەستەی فڕۆكەوانی مەدەنی وڵاتەكە نامەیەكی ناڕەزایەتی توندی ئاراستەی ڕێكخراوی نێودەوڵەتی فڕۆكەوانی"ئیكاو"  كرد و،  ڕایگەیاند هێرشی ئەم دواییە زیانی گیانی و ماددی گەورەی بە دامەزراوەكانی ڕادار و ئامێرەكانی بەڕێوەبردنی گەشتە ئاسمانییەكان گەیاندووە، ئەمەش مەترسییەكی جدی بۆ سەر سەلامەتی فڕۆكەوانی دروست كردووە و بووەتە هۆی ڕاگرتنی كاتیی گەشتە ئاسمانییەكان.

حكومەتی كوەیت ئەم هێرشانەی بە پێشێلكردنی ئاشكرای یاسا نێودەوڵەتییەكان و ڕێككەوتننامەی فڕۆكەوانی مەدەنی ناو برد و داوای لە ڕێكخراوەكە كرد هەڵوێستی هەبێت. 

هاوكات، سوپای پاسدارانی ئێران بەرپرسیارێتی هێرشەكەی گرتە ئەستۆ و ڕایگەیاند، لە ڕێگەی مووشەك و درۆنەوە بنكە سەربازییەكانی ناو كوێت، بەحرەین و ئوردنیان كردووەتە ئامانج، وەك وەڵامێك بۆ هێرشەكانی ئەمریكا لە ناوخۆی ئێراندا.

ئەمە سێیەمین ناڕەزایەتییە كە كوەیت پێشكەشی دەكات، دوای ئەوەی لە مانگەكانی ئازار و حوزەیرانی ڕابردووشدا هەمان هەنگاوی گرتبووە بەر. 

كوەیت جەختی كردەوە كە تەواوی مافە یاساییەكانی خۆی دەپارێزێت بۆ وەڵامدانەوەی ئەم دەستدرێژییانە كە زیان بە ئاسایشی ئاسمانی ناوچەكە دەگەیەنن و سەروەری وڵاتەكەی دەبەزێنن.