یەکێتیی ئەورووپا پێشوازی لە لێکتێگەیشتنی نێوان واشنتن و تاران دەکات

 ئەنتۆنیۆ کۆستا، سەرۆکی ئەنجومەنی ئەورووپا، جەخت لە گرنگیی کۆتاییهێنان بە جەنگ و دەستەبەرکردنی ئازادیی گەشتی دەریایی دەکاتەوە. 
ئەنتۆنیۆ کۆستا، سەرۆکی ئەنجومەنی ئەورووپا، لە بەیاننامەیەکدا دەستخۆشی لەو هەوڵە دیپلۆماسییە بێوچانانە کرد کە بوونە هۆی واژۆکردنی ئەم لێکتێگەیشتنە. ناوبراو ئاماژەی پێ کرد کە یەکێتییەکە بە ئومێدەوە دەڕوانێتە ئەم هەنگاوە بۆ تێپەڕاندنی قەیرانەکان و گەڕانەوەی تەواوەتیی ئاسایش بۆ گەرووی هورمز، کە شادەمارێکی گرنگی ئاڵوگۆڕی بازرگانیی جیهانییە. 
سەرۆکی ئەنجومەنی ئەورووپا داوای کرد کە دەبێت لەمەودوا دەنگی چەکەکان کپ بکرێت و تەواوی کێشە هەڵپەسێردراوەکان لە ڕێگەی ئاشتییەوە و بەپێی یاسا نێودەوڵەتییەکان چارەسەر بکرێن. کۆستا جەختی لەوەش کردەوە کە گەیشتن بەم ڕێککەوتنە دەرفەتێکی گرنگە بۆ سەقامگیریی ناوچەکە و دوورکەوتنەوە لە ململانێی سەربازی. 
لە کۆتایی بەیاننامەکەدا هاتووە کە یەکێتیی ئەورووپا ئامادەیی تەواوی هەیە بۆ بەشداریکردن لە داڕشتنی ستراتیژییەکی گشتگیر بە ئامانجی بەدیهێنانی ئاشتییەکی بەردەوام لە سەرانسەری ڕۆژهەڵاتی ناوەڕاستدا.