بۆ سەرکەوتنی ڕێکەوتن؛ ئەمریکا فشار لە ئیسرائیل دەکات لە سوریا و لوبنان بکشێتەوە

پەیام

بە پێى میدیاکانى ئەمریکا ئاڵۆزیی نێوان واشنتن و تەلئەبیب قووڵ بووەتەوە؛ دۆناڵد ترەمپ داوای کشانەوەی سوپای ئیسرائیل لە لوبنان و سووریا دەکات و بنیامین ناتانیاهۆش پابەندبوونی خۆی بە هەر ڕێککەوتنێک سەبارەت بە لوبنان ڕەت دەکاتەوە. 
بەگوێرەی ڕاپۆرتە ڕۆژنامەوانییەکانى میدیاکانى ئەمریکا و ئیسرائیل، پەیوەندییەکانی ئەمریکا و ئیسرائیل قۆناغێکی نوێی ساردی و کەمبوونەوەی هەماهەنگی بەخۆوە دەبینن. دۆناڵد ترەمپ، سەرۆکی ئەمریکا، بە توندی ڕەخنەی لە هێرشەکانی ئەم دواییەی ئیسرائیل بۆ سەر بەیرووت گرتووە و ڕایگەیاندووە کە ئەو هێرشانە "نەدەبوو ڕوو بدەن"، چونکە کردەوەکانی حزبوڵڵا لەو ئاستەدا نەبوون کاردانەوەی لەو شێوەیەیان هەبێت. ئەم گرژییانە کاتێک گەیشتنە لوتکە کە ترەمپ بە ئاشکرا ناتانیاهۆی بە سەرکردەیەکی بێ لۆژیک وەسف کرد و لە هەنگاوێکی بێپێشینەشدا، فەرمانی پێ کردووە پلانی هێرشەکانى دژی ئێران هەڵبووەشێنێتەوە. 
لە بەرانبەردا، بنیامین ناتانیاهۆ لە پەیوەندییەکی تەلەفۆنیدا بە ترەمپی ڕاگەیاندووە کە تەلئەبیب خۆی بەو بڕگانەی ڕێککەوتنی ئەمریکا و ئێران پابەند ناکات کە پەیوەندییان بە دۆخی لوبنانەوە هەیە. ناتانیاهۆ جەختی کردووەتەوە کە سوپای وڵاتەکەی لەو شوێنانەی باشووری لوبنان کە ئێستا تێیدایە ناکشێتەوە و بەردەوام دەبێت لە تێکدانی ژێرخانی سەربازیی حزبوڵڵا. ئەمە لە کاتێکدایە کە سەرچاوە ئیسرائیلییەکان ئاماژە بەوە دەکەن ترەمپ فشار دەکات بۆ کشانەوەی سوپا لە پێنج خاڵی ستراتیژی لە لوبنان و ناوچەی جەبەل شێخ لە سووریا، وەک بەشێک لە لێکتێگەیشتنێکی فراوانتر بۆ ڕاگرتنی هەمیشەیی شەڕ. 
ناوەندە ئەمنییەکانی ئیسرائیل نیگەرانن لەوەی لێکتێگەیشتنەکانی واشنتن و تاران ببێتە هۆی کەمکردنەوەی فشارە ئابوورییەکان لەسەر ئێران بێ ئەوەی چارەسەرێکی ڕیشەیی بۆ دۆسیەی ئەتۆمی بدۆزرێتەوە. لەم چوارچێوەیەدا، ناتانیاهۆ هەوڵ دەدات دوای گەڕانەوەی ترەمپ لە لووتکەی گرووپی حەوت، کۆبوونەوەیەکی بەپەلەی لەگەڵدا ئەنجام بدات بۆ ڕوونکردنەوەی هەڵوێستی وڵاتەکەی و کاریگەری دانان لەسەر داڕشتنی ڕێککەوتنەکان. شرۆڤەکارانی ئەمریکی ئاماژە بەوە دەکەن کە متمانە لە نێوان هەردوولادا بەرەو نەمان دەچێت و ترەمپ بە شێوازێکی توند فشاری خستووەتە سەر ئیسرائیل کە لە چەند دەیەی ڕابردوودا وێنەی نەبووە.