ئێران: وەفدەکەمان گەڕایەوە و چەندین لیژنەى چاودێری و تەکنیکی پێکهێنراون

وەزارەتی دەرەوەی ئێران ڕایگەیاند بۆ جێبەجێکردنی بڕگەکانی ڕێککەوتنامەی لێکتێگەیشتن، چەندین لیژنەی تەکنیکی و چاودێرى پێکدەهێنرێن، هاوکات شاندی دانوستانکاری وڵاتەکە دوای کۆبوونەوە چڕوپڕەکانی سویسرا گەڕانەوە تاران. 
تاران ئاماژەی پێ کردووە کە بەیاننامەی هاوبەشی پاکستان و قەتەر گرنگییەکی تایبەتی هەیە و یەکێک لە تەوەرە سەرەکییەکانی، پێکهێنانی لیژنەیەکی سەرپەرشتیارە بۆ چاودێریکردنی جێبەجێکردنی لێکتێگەیشتنەکان. لەم چوارچێوەیەدا، میکانیزمێکی تایبەت بۆ بەدواداچوونی بڕگەی یەکەمی ڕێککەوتنەکە سەبارەت بە لوبنان دادەمەزرێت کە بایەخێکی زۆری بۆ لایەنی ئێرانی هەیە. 
لە بەشێکی دیکەی ڕاگەیەندراوەکەدا هاتووە کە پرسی فرۆشتنی نەوت، وەرگرتنی مۆڵەتی هەناردەکردن و ئازادکردنی داراییە بلۆکەکراوەکانی ئێران تاوتوێ کراون و ڕێکاری پێویست بۆ جێبەجێکردنیان گیراوەتە بەر. 
هاوکات تەلەفزیۆنی فەرمیی ئێران بڵاویکردەوە، شاندی دانوستانکاری وڵاتەکە بە سەرۆکایەتیی محەمەد باقر قاڵیباف، دوای ١٨ کاتژمێر لە گفتوگۆی چڕ و ئاڵۆز لە سویسرا، بەرەو تاران گەڕاونەتەوە. بڕیارە لیژنە تەکنیکییەکان بەپێی بڕگەی ١٢ی لێکتێگەیشتنەکە، بەردەوام بن لە کارەکانیان بۆ داڕشتنی میکانیزمی جێبەجێکردنی تەواوی بڕگەکان و گەیشتن بە ئەنجامی کۆتایی.