لوبنان.. ئاماری قوربانییانی هێرشەكانی دوێنێی سوپای زایۆنی بۆ 83 كوژراو بەرز بووەوە

پەیام

وەزارەتی تەندروستی لوبنان نوێترین ئاماری قوربانییانی هێرش و بۆردومانەكانی سوپای قەوارەی ئیسرائیلی بۆ سەر وڵاتەكەی بڵاو كردەوە. 

بەپێی ڕاگەیەندراوێكی فەرمی وەزارەتی تەندروستیی لوبنان، تەنیا لە ڕۆژی هەینیدا ژمارەی كوژراوان گەیشتووەتە 83 كەس و 141 كەسی دیكەیش بریندار بوون. 

ئەم ئامارانە لە كاتێكدایە، پێشتر وەزارەتەكە ئاماژەی بە 47 كوژراو و 97 بریندار كردبوو، بەڵام بەهۆی سەختی هێرشەكانەوە ژمارەی قوربانییان بە شێوەیەكی بەرچاو ڕووی لە زیادبوون كردووە.

هاوكات هێرشەكانی سوپای زایۆنی بۆ سەر لوبنان لە بەرەبەیانی ئەمڕۆ شەممەشەوە بەردەوام بوون و لە ئەنجامی ئەو هێرشانەدا 17 كەسی دیكە كوژراون كە لە نێویاندا دوو منداڵ هەن، هەروەها حەوت كەسی دیكەش بێسەروشوێنن. 

بەپێی ئامارەكان لە سەرەتای مانگی ئاداری ئەمساڵەوە و تا ئێستا زیاتر لە چوار هەزار و 57 كەس لە لوبنان كوژراون و 12 هەزار و 121 كەسیش بریندار بوون.

لە نوێترین پێشهاتیشدا و بەپێی كەناڵی 12ی عیبری، هەر یەك لە سەرۆكوەزیران و وەزیری بەرگریی قەوارەی ئیسرائیل فەرمانیان بە سوپای قەوارەكەیان داوە شەڕ و هێرشەكانی بۆ سەر لوبنان ڕابگرێت.