نەتەنیاهوو: ڕێككەوتنەكەمان لەگەڵ لوبنان گورزێكی كوشندەیە بۆ ئێران

پەیام

دوای ئەوەی ئێوارەی دوێنێ لە واشنتۆن، لوبنان و ئیسرائیل بە چاودێریی ئەمریكا ڕێككەوتنێكی چوارچێوەییان واژوو كرد. بنیامین نەتەنیاهوو، سەرۆكوەزیرانی ئیسرائیل، ڕێككەوتنەكەی بە "دەستكەوتێكی گەورە" و "گورزێكی كوشندە بۆ ئێران" ناوبرد،

جەختی لەوەش كردەوە، كە سوپاى ئیسرائیل لە "پشتێنەی ئەمنی"دا دەمێنێتەوە تاوەكو حزبوڵڵا بە تەواوی چەك دەكرێت.

لەبارەی وردەكاری ڕێككەوتنەكەوە نەتەنیاهوو ئاماژەی بەوە كرد، كە ڕێگە بە سوپای لوبنان دەدرێت تەنها لە دوو ناوچەی ئەزموونی لە باشوور جێگیر ببن، بەڵام ڕێگری لە گەڕانەوەی دانیشتووان و حزبوڵڵا بۆ ناو پشتێنە ئەمنییەكەی ژێر دەسەڵاتی ئیسرائیل دەكەن. 

هاوكات سەرچاوە لوبنانییەكان باس لەوە دەكەن كە ئەم ڕێككەوتنە وەك هەنگاوێكی سەرەتایی و خشتەیەكی كاتییە بۆ كشانەوەی پلەبەندیی هێزەكانی ئیسرائیل لە ناوچە داگیركراوەكان.