ئەڵمانیا.. هێرشبەرەكەی سەر بازاڕی كریسمس كە چالاكێكی دژە ئیسلامە سزادرا

پەیام

دادگایەكی ئەڵمانیا سزای هەتاهەتایی بەسەر پزیشكێكی سعوودیدا سەپاند كە چالاكێكی دژە ئیسلامە و بە ئۆتۆمبێلێك هێرشی كردبووە سەر بازاڕێكی كریسمس و بەو هۆیەوە زیاتر لە 300 كەس بوونە قوربانی.

دادگایەكی شاری ماگدێبۆرگی ئەڵمانیا سزای زیندانیی تاهەتایی بەسەر پزیشكێكی دەروونیی سعوودی بەناوی "تاڵب جەواد عەبدولموحسن" (51 ساڵ) سەپاند. تۆمەتبارەكە بە كوشتنی شەش كەس و هەوڵی كوشتنی 338 كەسی دیكە لە هێرشێكی دڕندانەدا بۆ سەر بازاڕێكی كریسمس لە كۆتایی ساڵی 2024 تۆمەتبار كرابوو.

هێرشەكە لە 20ی كانوونی یەكەمی 2024 ڕووی دا، كاتێك ناوبراو بە ئۆتۆمبێلێكی خێرا خۆی كێشا بە نێو كۆمەڵێك كڕیاردا و بەهۆی زۆریی ژمارەی قوربانییەكان و كەسوكاریان، دادگاییكردنەكە لە هۆڵێكی گەورەی كاتی لە دەرەوەی شار بەڕێوە چوو.

دادگاكە جەختی لەوە كردەوە كە تاوانەكە "زۆر مەترسیدارە"، ئەمەش وا دەكات ئەگەری ئازادكردنی لە داهاتوودا نزیك بێت لە مەحاڵ. 

بەپێی لێكۆڵینەوەكان، عەبدولموحسین كە لە ساڵی 2006 گەیشتووەتە ئەڵمانیا، چالاكێكی توندی دژەئیسلامە و هاوسۆزیش بووە بۆ بیرۆكە توندڕەوە ڕاستڕەوەكان و تیۆرەكانی پیلانگێڕی.

وتەبێژی دادگاكە ئاماژەی بەوە كرد "تۆمەتبار تووشی "شێواوی كەسایەتی نەرجسی" بووە و تەنها خۆی دەبینێت و هیچ ئازارێكی قوربانییەكان هەستی نەجوڵاندووە.