میدیاكانی ئێران: هێڵی پەیوەندی لەگەڵ ئەمریكا دانراوە بۆ ڕێگری لە پێكدادان لە هورمز

پەیام

میدیای ئێران بڵاوی كردەوە كە هێڵی پەیوەندی لەگەڵ ئەمریكا دانراوە بۆ ڕێگری لە پێكدادانی سەربازیی لە گەرووی هورمز، وتەبێژی سوپای پاسدارانیش ڕەتی دەكاتەوە.

پرێس تیڤی ئێرانی بڵاوی كردەوە هێڵی پەیوەندی سەربازیی لەنێوان ئێران و ئەمریكا دانراوە لەپێناو ڕێگری كردن و  دووركەوتنەوە لەو ڕووداوانەی دەبنە هۆی سەرهەڵدانی ململانێ لە گەرووی هورمز.

بەڵام دواتر حسێن موحیبی، وتەبێژی سوپای پاسدران، ڕەتی كردەوە، كە هیچ هێڵێكی پەیوەندیی ڕاستەوخۆ لەنێوان سوپای پاسداران و سوپای ئەمریكا پەیوەست بە گەرووی هورمز هەبێت.

هاوكات لای خۆیەوە تەلەفزیۆنی ئێرانی بڵاوی كردەوە سوپای پاسداران سێ كەشتی نەوتهەڵگری وەستاندووە هەوڵیانداوە بەبێ ڕەزامەندی گەرووی هورمز تێپەڕێنن.

تەلەفزیۆنی ئێرانی دەڵێت ئەو كەشتیە نەوتهەڵگرانە ویستیان بەبێ هەماهەنگی سوپای پاسداران گەرووی هورمز تێپەرێنن و ئەوەش وای كرد ئاگاداربكرێنەوە و بوەستێنرێن پێش ئەوەی بگەرێنەوە بۆ كەنداو.

بەرپرسانی ئێران جەخت دەكاتەوە پەڕینەوەی كەشتیەكان بە گەرووی هورمز پێویستە بەو ئاراستەیەدا بێت كە ئێران بە هامەهەنگی هێزە چەكدارەكانی دیاری دەكات.