عێراق: بەنیازین بەرهەمهێنانی نەوت بۆ حەوت ملیۆن بەرمیل بەرزبكەینەوە

پەیام

سەرۆكوەزیرانی عێراق ئاماژە بە ئەگەری چوونە دەرەوەی وڵاتەكەی لە ڕێكخراوی ئۆپێك و بەرزكردنەوەی بەرهەمهێنانی نەوت بۆ حەوت ملیۆن بەرمیلی ڕۆژانە دەكات.

لە گفتوگۆیەكی تەلەفزیۆنی لەگەڵ تۆڕی سكای نیوزی بەریتانی، عەلی زەیدی سەرۆكوەزیرانی عێراق ڕایگەیاند: لەكاتێكدا مانگی نۆی ئەمساڵ هێزەكانی هاوپەیمانیی نێودەوڵەتی بەتەواوەتی عێراق جێ دەهێڵن چاومان لە ئامادەیی ئەمریكا لە قۆناغی دواتردا لە ڕێی هاوبەشیی ئابووری و وەبەرهێنان و گەشەپێدانە.

عەلی زەیدی ئاماژەی بەوەش دا هەر یەك لە وەزارەتەكانی نەوت و كارەبایان ڕاسپاردووە كە لە بوارەكانی وزە و پەیوەندییەكان و تەكنەلۆجیادا هەلی لەپێشینە بە كۆمپانیاكانی ئەمریكا بدەن. 

زەیدی ڕایشیگەیاند: سەردانە چاوەڕوانكراوەكەمان بۆ ئەمریكا تەنیا پڕۆتۆكۆڵی تێپەڕ نییە، بەڵكو ڕاگەیاندنی قۆناغێكی نوێی هاوبەشیی نێوان عێراق و ئەمریكایە لەسەر بنەمای بەرژەوەندی هاوبەش و ڕێزی دوو لایەنە.

سەرۆكوەزیرانی عێراق لەگەڵ ئەوەی ئاماژەی بە ئەگەری دەرچوون لە ژێر كۆتوبەندەكانی ڕێكخراوی ئۆپێك كرد، وتیشی: چاومان لەوەیە لە سێ ساڵی داهاتوودا ئاستی بەرهەمهێنانی نەوت بۆ حەوت ملیۆن بەرمیلی ڕۆژانە بەرز بكەینەوە، ئەوەشمان بە كۆمپانیا ئەمریكییەكان گەیاندووە.