شاندێكی باڵای عێراق بۆ دەستگیركردنی چەند بەرپرسێك گەیشتە هەرێم

پەیام 

شاندێكی باڵای دەستەی دەستپاكی عێراق گەیشتە هەرێم بۆ دەستبەسەرداگرتنی سەروەتەكەی عەدنان جومەیلی و دەستگیركردنی چەند بەرپرسێكی دیكە.

شاندێكی باڵای دەستەی دەسپاكی فیدراڵی بە مەبەستی دەستبەسەرداگرتنی سەروەت و سامانی عەدنان ئەلجومەیلی و دەستگیركردنی چەند بەرپرسێكی باڵای تێوەگلاو لە دۆسێكانی گەندەڵی و سپیكردنەوەی پارە، گەیشتە پارێزگاكانی هەرێمی كوردستان و دەستی بە لێكۆڵینەوەیەكی ورد و نهێنی كردووە.

سەرچاوە ئاگادارەكان ئاشكرایان كردووە، ئەم سەردانە كتوپڕە و دوور لە چاوی میدیاكان، دوای ئەو دانپێدانانە مەترسیدارانە دێت كە عەدنان جومەیلی، بریكاری لادراوی وەزارەتی نەوت داویەتی، كە تێیدا پەردەی لەسەر تێوەگلانی چەند كەسایەتییەك لاداوە كە ناوی كەسایەتی كوردییان تێدایە.

بەپێی سەرچاوەیەكی باڵای حكومی، جوڵەی شاندە دادوەرییەكە شارەكانی هەولێر، سلێمانی و دهۆك دەگرێتەوە بۆ دەستبەسەرداگرتنی هەموو ئەو موڵك و ماڵانەی جومەیلی كە لە هەرێم هەیەتی؛ ئەوەش وەك ڤێلا، كێڵگە و ئۆتۆمبێلی گرانبەها كە بەشێكیان بۆ چەواشەكاری و لە چوارچێوەی پڕۆسەی سپیكردنەوەی پارەدا بە ناوی كەسانی دیكەوە تۆماركراون.

هاوكات، شاندەكە هەڵگری فەرمانی دەستگیركردنە بۆ دوو یان سێ كەس لەوانەی تێوەگلاون، كە دوو ناوی دیار و باڵایان تێدایە؛ یەكێكیان لە ئێستادا لە پۆستێكی باڵادایە و ئەوی دیكەیان بەرپرسێكی پێشووە.

تاوەكو ئێستا بۆ سەركەوتنی پڕۆسەی گەڕاندنەوەی پارە دزراوەكان، ناوەكان بە نهێنی هێڵدراونەتەوە.