ئەمریکا دەست بە ناردنی بارە دۆلارەكان بۆ عێراق دەکاتەوە

پەیام 

واشنتن بڕیاری دا بە ناردنەوەی دۆلار بۆ عێراق لە ڕێگەی یەدەگی فیدراڵییەوە، ئەمەش دوای هەنگاوەكانی بەغدا بۆ كەمكردنەوەی هەژموونی ئێران و پێش سەردانە چاوەڕوانكراوەكەی سەرۆكوەزیرانی عێراق دێت بۆ كۆشكی سپی و دیداری دۆناڵد ترەمپ.

بەپێی ڕاپۆرتێكی هاوبەشی ئاژانسی ڕۆیتەرز و ڕۆژنامەی نیویۆرك تایمز، ئەمریكا بڕیاری داوە دەست بكاتەوە بە ناردنی بارە دۆلارەكان بۆ عێراق كە بۆ چەند مانگێك ڕاگیرابوون.

ڕاپۆرتەكە ئەم هەنگاوە دەبەستێتەوە بەو پێشكەوتنانەی حكومەتی عێراق لە بواری سنوورداركردنی هەژموونی ئێران لەناو وڵاتەكەیدا بەدەستی هێناوە.

واشنتن پێشتر ڕاگرتنی ناردنی دۆلار و پچڕاندنی هەماهەنگییە ئەمنی و هەواڵگرییەكانی وەك كارتێكی فشاری ئابووری بەكارهێنا تاوەكو بەغدا ناچار بكات ڕێكاری توند بەرامبەر گرووپە چەكدارەكان بگرێتە بەر و دەسەڵاتی تاران كەم بكاتەوە.

ئیدارەی ئەمریكا پێی وایە حكومەتی ئێستا دەستی بە هەنگاوی كردەیی لەو ئاراستەیەدا كردووە، بۆیە وەك نیشانەیەك بۆ پشتگیری، بارە دۆلارەكانی بۆ ناردووەتەوە.

سەرەڕای ئەم پێشكەوتنە ئابوورییە، ڕاپۆرتەكە ئاماژە بەوە دەكات كە هاوكارییە سەربازی و ئەمنییەكانی نێوان هەردوو وڵات هێشتا بە ڕاگیراوی ماونەتەوە.

پێشبینی دەكرێت ئەم سیستەمە بەردەوام بێت تا ئەو كاتەی بەغدا هەموو ئەو مەرجە ئەمنییانەی ئەمریكا جێبەجێ دەكات كە پەیوەستن بە دۆسیە هەستیارەكان و سەقامگیری ناوچەكە.