ملیۆنان ئێرانی لە تاران ماڵاوایی لە تەرمی عەلی خامنەیی دەكەن

پەیام 

دووەم ڕۆژی مەراسیمی ماڵاوایی و بەخاكسپاردنی عەلی خامنەیی ڕێبەری پێشووی ئێران لە تاران بەڕێوە دەچێت.

بەرەبەیانی ئەمڕۆ شەممە، بە بەشداری دەیان هەزار كەس، لە موسەڵای ئیمام خومەینی لە تاران، دووەم ڕۆژی ڕێوڕەسمی ماڵاوایی لە تەرمی عەلی خامنەیی دەستی پێكرد.

بەشداربووان بە گوتنەوەی دروشم دژی ئەمریكا و قەوارەی ئیسرائیل و بەرزكردنەوەی دروشمی ئایینی، خەمی خۆیان دەربڕی. 

شارەوانی تاران بۆ ئاسانكاری هاتوچۆی ماتەمگێڕان چەند وێستگەیەكی مێترۆی بە شێوەیەكی كاتیی كردووەتەوە، پێشبینییش دەكرێت لە ماوەی شەش ڕۆژدا نزیكەی 15 بۆ 20 ملیۆن كەس لە شارە جیاوازەكانی ئێران و عێراق بەشداری مەراسیمەكان بكەن.

بڕیاریشە تابووتی خامنەیی لە مەڕاسیمەكە لە شوێنێكدا دابنرێت كە بتوانرێت ببینرێت و بەشداربووان لە كەنارییەوە تێپەڕن.

بەپێی خشتەی ڕاگەیەنراو، ئەمڕۆ و سبەی لە تاران مەراسیمی جەماوەری بەڕێوە دەچێت، ڕۆژی دووشەممەیش ڕێوڕەسمی سەرەكی  هەر لە تاران بەڕێوە دەچێت پاشان تەرمی خامنەیی دەبرێتە شاری قوم، ڕۆژی چوارشەممەش دەگەیەنرێتە نەجەف و كەربەلا لە عێراق بۆ بەڕێوەچوونی مەراسیمی ئایینی و 24 كاتژمێر دەمێنێتەوە. 

دواجار ڕۆژی پێنجشەممە لە مەزارگەی ئیمام ڕەزا لە شاری مەشهەد كە زێدی خۆیەتی، بە خاك دەسپێردرێت. 

ئەمەو خامنەیی لە سەرەتای جەنگی ئەمریكا و ئیسرائیل دژی ئێران لە 28ی شوباتدا، لەگەڵ چوار ئەندامی خێزانەكەی تیرۆر كران، بەڵام بەهۆی بەردەوامی جەنگەوە نەتوانرا بەخاك بسپێردرێت و چوار مانگ دوا خرا.