2 کاتژمێر پێش ئێستا
38 جار خوێنراوەتەوە
مالیكی هۆشداریی لە دەستبەرداربوون لە چوارچێوەی هەماهەنگی دەدات
پەیام
سەرۆكی هاوپەیمانیی دەوڵەتی یاسا هۆشداریی لە دەستبەرداربوون لە هاوپەیمانیی چوارچێوەی هەماهەنگی دا.
لە نووسینێكیدا لە تۆڕی ئێكس، نووری مالیكی سەرۆكی هاوپەیمانیی دەوڵەتی یاسا ڕایگەیاند: چوارچێوەی هەماهەنگی پڕۆژەیەكی سیاسی، نیشتمانییە و سەركەوتنی خۆی سەلماندووە.
مالیكی نووسیویشیەتی: چوارچێوەی هەماهەنگی پڕۆسەی سیاسیی نیشتمانی لەخۆ گرتووە و ئەوەش كە توانیویەتی سێ كابینەی حكوومیی پێك بهێنێت بەڵگەیەكی كردەیی و تیۆرییە لەسەر سەركەوتنی ئەو پڕۆژەیە و توانای لە بەڕێوەبردنی قۆناغەكە و بەدیهێنانی هاوسەنگی.
سەرۆكی هاوپەیمانیی دەوڵەتی یاسا كە هاوكات سەرۆكی حزبی دەعوەی ئیسلامییشە پێی وایە لەو ڕوانگەیەوە هیچ هۆكارێك نییە بۆ دەستبەرداربوون لە پڕۆژەیەكی وەك چوارچێوەی هەماهەنگی كە سەركەوتنی خۆی سەلماندووە، ئەو نووسیویەتی: چوارچێوەی هەماهەنگی وەك خۆی و بە پارێزگارییكردن لە بنەما و شوناس و دامەزرێنەرانیەوە دەمێنێتەوە.
چوارچێوەی هەماهەنگی، هاوپەیمانییەكی سیاسیی زۆرینەی هێز و لایەنە شیعییەكانی عێراقە لە مانگی ئاداری ساڵی 2021ـەوە و وەك گەورەترین كوتلەی پەڕلەمانی و پاڵپشتیی لە كابینەی حكوومییەكان دروست كراوە.
لە تۆڕە کۆمەڵایەتیەکان شەیری بکە