سەرۆکی ئەمریکا و سەرۆکی ئۆکرانیا لە ئەنقەرە بۆ کۆتاییهێنان بە جەنگ کۆ دەبنەوە

ڤۆلۆدیمێر زێلێنسکی سەرۆکی ئۆکرانیا ڕایگەیاند لەگەڵ دۆناڵد ترامپ سەرۆکی ئەمریکا بۆ گفتوگۆ دەربارەی یەکلای کردنەوە و کۆتایی هێنان بە جەنگ لە شاری ئەنقەرە کۆدەبێتەوە 
ڤۆلۆدیمێر زێلێنسکی سەرۆکی ئۆکرانیا لە ڕێگەی گفتوگۆیەکی تەلەفۆنییەوە پیرۆزبایی ‎٢٥٠‎ەمین ساڵیادی سەربەخۆیی ویلایەتە یەکگرتووەکانی ئەمریکای لە دۆناڵد ترامپ سەرۆکی ئەمریکا کرد، هەردوولا ڕێککەوتوون لە پەراوێزی لووتکەی ناتۆ لە شاری ئەنقەرە دیدارێکی ڕاستەوخۆ ئەنجام بدەن بۆ تاوتوێکردنی دوایین گۆڕانکارییەکانی جەنگی نێوان ڕووسیا و ئۆکرانیا. ڤۆلۆدیمێر زێلێنسکی وێڕای سوپاسکردنی واشنتن بۆ پشتگیرییەکانی، جەختی کردەوە هەڵوێستی ئەمریکا لەم قۆناغەدا بۆ کۆتاییهێنان بە ململانێکان بڕیاردەر و یەکلاکەرەوە دەبێت. 
ناوبراو ئاماژەی بەوە دا کە ئێستا دەرفەتێکی ڕاستەقینە بۆ کۆتاییهێنان بە جەنگ دروست بووە و لە دیداری ئەنقەرەدا لەسەر وردەکارییەکانی ئەو پرسە بەردەوام دەبن. 
ئەم لێدوانە نوێیە دوای ئەوە دێت کە سوپای ڕووسیا لە ڕۆژانی ڕابردوودا ژمارەیەک هێرشدی بەرفراوانی بە مووشەک و درۆن کردە سەر شاری کیێڤ، کە بووە هۆی کوژران و بریندار بوونی دەیان کەس و وێرانکردنی چەندین وێستگەی وزە و باڵەخانەی نیشتەجێبوون.