وتەبێژی سوپای ئێران هۆشداری توند دەداتە دوژمنانی وڵاتەكەی

پەیام 

وتەبێژی سوپای ئێران ڕایدەگەیەنێت هەر هەڵەیەكی دوژمن بە وەڵامێكی توند و یەكلاكەرەوەی هێزە چەكدارەكانیان بەرەوڕوو دەبێتەوە.

عەمید محەممەد ئەكرەمی نیا، وتەبێژی سوپای كۆماری ئیسلامیی ئێران (ئەرتەش)، لە پەراوێزی ڕێوڕەسمی بەخاكسپاردنی تەرمی عەلی خامنەیی هۆشدارییەكی توندی ئاراستە كرد و ڕایگەیاند، هەر جۆرە گەمژەییەك لەلایەن نەیارانەوە، بە وەڵامێكی توند و وێرانكەری هێزە چەكدارەكان بەرەوڕوو دەبێتەوە. 

ئاماژەی بەوەش كرد، سوپا هەموو دەرفەتێكی ئاگربەست بۆ بەهێزكردنی توانای جەنگیی خۆی بەكاردەهێنێت و بۆ ساتێكیش لەم ئامانجە غافڵ نابێت.

ئەكرەمی نیا وێڕای ستایشی بەشداریی ملیۆنیی خەڵك، جەختی كردەوە، كە ئەم جەماوەرە ئەركێكی مێژوویی لەسەرشانە و تاوەكو گەیاندنی ئەم شۆڕشە بە دەستی ئیمام مەهدی بەردەوام دەبن. 

هیوایشی خواست كە خوێنی ڕێبەرەكەیان ببێتە هۆی بەخەبەرهاتنی كۆمەڵگەی نێودەوڵەتی و ڕاپەڕینی گەلان دژی ستەم و داگیركرای جیهانی، تاوەكو جیهان لە چنگی زاڵمان ڕزگار بكەن. 

جەختیشی كردەوە كە سوپا لە بەرزترین ئاستی ئامادەباشیدایە بۆ بەرپەرچدانەوەی هەر هەڕەشەیەك.